2,064 total views
Ibinahagi ng kinatawan ng mga Franciscano sa Pilipinas ang mahahalagang paksang tinalakay sa United Nations Climate Change Conference of Parties o COP27 summit sa Sharm El Sheikh, Egypt.
Ayon kay Fr. Angel Cortez, OFM, Provincial Animator ng Justice, Peace and Integrity of Creation ng Province of San Pedro Bautista-Philippines, tinalakay sa COP27 summit ang adaptation o pakikiangkop sa kalagayan ng mga bansang apektado ng climate change.
Ipinaliwanag ng pari na mahalagang maunawaan ng pamahalaan ng iba’t-ibang bansa kabilang na ang Pilipinas sa kalagayan ng mga pamayanan na direktang apektado ng nagaganap na pagbabago sa kapaligiran.
“Kung gaano ka-grabe ‘yung sitwasyon, ano ‘yung epekto, ano ‘yung nasira, gaano kalaki ‘yung pinsala, at nandun din ‘yung pakikiangkop kung paano sila tutugon dahil nakita nila ‘yung kalagayan at sitwasyon ng mga apektadong pamayanan.” pahayag ni Fr. Cortez sa panayam ng Radio Veritas.
Pinagtuunan din sa pagtitipon ang mitigation o pagbabawas na layunin ng Paris Agreement na nagtatakda sa temperatura ng mundo sa 1.5 degrees-Celsius.
Sinabi ni Fr. Cortez na patuloy na isinusulong ng mga mahihina o bulnerableng bansa ang kasunduan dahil sa labis na epekto ng pag-init ng kapaligiran na nagdudulot ng malalakas na sakuna.
Tinalakay din sa COP27 summit ang climate action o pagkilos ng mga bansa upang maisakatuparan ang mga layunin para sa loss and damage mechanism na kailangan ng mga bansang madalas na biktima ng malalakas na kalamidad tulad ng Pilipinas.
Tiniyak naman ni Fr. Cortez ang patuloy na pagkilos at pakikibahagi ng simbahan sa pagsusulong ng pangangalaga sa nag-iisang tahanan sa inspirasyon ng liham-ensiklikal na Laudato Si’ ng Kanyang Kabanalang Francisco.
Kabilang dito ang panawagan sa pamahalaan at financial institutions na ihinto na ang pamumuhunan sa mga malalaking korporasyong lumilikha ng pinsala sa inang kalikasan.
Ang COP27 Summit ay dinaluhan ng mga pinuno at kinatawan mula sa iba’t ibang grupo, organisasyon at bansa upang sagipin ang daigdig sa lumalalang climate crisis.
