334 total views
Nagpahayag ng pagkadismaya at pagkabahala ang Apostolic Vicariate of Puerto Princesa sa naiulat na pagkawala ng tinatayang ₱3 milyong pondo mula sa Most Sacred Heart of Jesus Parish sa Rio Tuba, Bataraza, Palawan.
Tiniyak naman ni Puerto Princesa Bishop Socrates Mesiona ang pakikiisa ng bikaryato sa isinasagawang imbestigasyon ng mga awtoridad kaugnay ng naiulat na pagkawala ng pondo ng Simbahan.
Sa inilabas na pahayag ng Obispo, inilarawan ng Bikaryato ang insidente bilang isang nakalulungkot at nakababahalang pangyayari na nangangailangan ng masusing pagsisiyasat upang matukoy ang tunay na nangyari.
“Nakalulungkot at nakababahala ang naiulat na pagkawala ng tinatayang tatlong milyong piso mula sa Most Sacred Heart of Jesus Parish sa Rio Tuba, Bataraza, Palawan.” Bahagi ng pahayag ni Bishop Mesiona.
Ayon sa Bishop Mesiona, buong pakikipagtulungan ang ibinibigay ng Apostolic Vicariate of Puerto Princesa sa mga kinauukulang awtoridad upang mapabilis ang paglilinaw sa insidente at matukoy ang katotohanan sa pagkawala ng tinatayang ₱3 milyong pondo ng parokya.
Nanawagan din ang Bikaryato sa sinumang may impormasyon na maaaring makatulong sa imbestigasyon na makipag-ugnayan sa mga awtoridad upang makatulong sa paglutas ng kaso.
“Buong pakikipagtulungan ang ibinibigay ng Bikaryato sa kasalukuyang imbestigasyong isinasagawa ng mga awtoridad upang matukoy ang katotohanan at malinawan ang mga pangyayari.
Hinihikayat din namin ang sinumang may impormasyong makatutulong sa imbestigasyon na makipag-ugnayan sa mga kinauukulang awtoridad.” Dagdag pa ni Bishop Mesiona.
Kasabay nito, hiniling ni Bishop Mesiona ang panalangin ng mga mananampalataya upang manaig ang katotohanan at katarungan.
“Hinihiling namin ang panalangin ng lahat upang manaig ang katotohanan at katarungan.” Apela ni Bishop Mesiona.
Sa harap ng insidenteng ito, hinihikayat ng Apostolic Vicariate of Puerto Princesa ang lahat ng mananampalataya na makiisa sa panalangin at igalang ang proseso ng imbestigasyon upang lubos na maitaguyod ang katotohanan, katarungan, at pananagutan.
