24,349 total reads
Inaprubahan na ni Pope Leo XIV ang kahilingan ng Archdiocesan Shrine of Santo Niño sa Tondo, Manila na maitaas ito bilang isang minor basilica.
Kinumpirma ng dambana na inilabas ng Vatican ang decree noong November 9, 2025, kasabay ng Kapistahan ng Dedication of the Lateran Basilica sa Roma.
Sa pag-aproba ng Vatican, ang Sto. Niño de Tondo ang magiging ikaanim na minor basilica sa Archdiocese of Manila, kasunod ng maringal na deklarasyon ng Basilica Minore de Nuestra Señora del Pilar o Sta. Cruz Church noong November 21.
Isa sa pinakamatandang parokya sa Maynila, ang Sto. Niño de Tondo ay itinatag ng mga misyonerong Agustino noong 1572. Dito rin dinala ang isang mahalagang imahen ng Santo Niño na naging sentro ng debosyon ng mga mananampalataya at patuloy na pinagbubuklod ang komunidad sa paglipas ng mga siglo.
Sa panahon ng mga Espanyol, nagsilbi ang simbahan bilang mahalagang pook ng pagpapalaganap ng Kristiyanismo sa Tondo at mga karatig-barangay.
Bagama’t ilang ulit napinsala dahil sa mga digmaan, sunog, at lindol, nananatiling matatag ang debosyon ng mga taga-Tondo. Ang kasalukuyang istruktura, na itinayo noong 1734, ay patuloy na pinangangalagaan bilang makasaysayan at espiritwal na pamana.
Dahil sa malawak at masiglang debosyon, idineklara ito bilang Archdiocesan Shrine, isang pagkilalang nagtatampok sa natatangi nitong papel sa pananampalatayang Katoliko sa lungsod.
Sa Archdiocese of Manila, ilan pang minor basilica ang Manila Cathedral, Minor Basilica of the Black Nazarene (Quiapo Church), San Sebastian Church, at ang Minor Basilica and National Shrine of San Lorenzo Ruiz (Binondo Church).
