380 total views
Hinikayat ni Bayombong Bishop Jose Elmer Mangalinao ang mga mamamayan na ipagpatuloy ang pagtatanggol sa kalikasan at suportahan ang mga nagbabarikada sa Kasibu, Nueva Vizcaya, na patuloy na naninindigan para sa pagtatanggol sa kabundukan at likas na yaman ng lalawigan.
Sa pagdiriwang ng banal na misa sa barikada sa Barangay Paquet noong Hunyo 9, inihalintulad ng obispo ang mga nagbabarikada sa “asin” at “ilaw” ng mundo na binabanggit sa Ebanghelyo dahil sa kanilang pagsisikap na pangalagaan ang kalikasan at kabuhayan ng mamamayan.
Ayon kay Bishop Mangalinao, ang Salita ng Diyos ay paanyaya sa bawat Kristiyano na magmalasakit hindi lamang sa kapwa kundi maging sa kalikasan na pinagmumulan ng buhay at kabuhayan ng sambayanan.
“Ang mga nagbabarikada ay maituturing na asin dahil sila ang nagpapanatili ng ganda at kasariwaan ng bundok at nagbibigay ng lasa at sigla sa pananampalataya,” pahayag ni Bishop Mangalinao.
Sinabi rin niya na tulad ng ilaw na nagbibigay-liwanag sa dilim, nagsisilbing saksi sa katotohanan ang mga mamamayang patuloy na naninindigan para sa kalikasan sa kabila ng mga hamon at pangamba.
Binigyang-diin din ng obispo na ang anumang pakikibaka ay dapat isagawa nang may paggalang at pagmamahal sa kapwa at hindi paghahasik ng galit o pagkamuhi.
“Tayo ay narito, naninindigan sa katotohanan nang may paggalang at pagmamahal. Tayo ay naninindigan para sa kalikasan at sa buhay. Hindi tayo laban sa tao kundi tayo ay para sa buhay,” ani Bishop Mangalinao.
Tinawag din ni Bishop Mangalinao ang mga nagbabarikada bilang mga “unang sundalo” sa pagtatanggol sa kalikasan, mga kabundukan, ilog, at kabuhayan ng mga mamamayan, at kinilala ang kanilang mga sakripisyo para sa kinabukasan ng susunod na henerasyon.
“Hindi madali ang ginagawa ng mga nagbabarikada. Sila ay nagpupuyat, nagtatrabaho at nagsasakripisyo para sa kinabukasan ng sambayanan,” saad ni Bishop Mangalinao.
Tiniyak naman ng obispo ang suporta ng Simbahan sa mga mamamayang nagsusulong ng pangangalaga sa kalikasan at nagtataguyod ng kabutihang panlahat.
Samantala, nakiisa rin sa pagdiriwang sina Radyo Veritas Bayombong Station Manager Fr. Christian Dumangeng at Bayombong Social Action Director Fr. Crispin Costales, gayundin ang iba pang pari ng Diocese of Bayombong bilang pakikiisa sa panawagan para sa pangangalaga sa kalikasan.
Matatandaang saklaw ng exploration permit ng North Luzon Minerals Resources Corporation ang walong barangay sa Kasibu, kung saan nagpapatuloy ang barikada ng mga residente at iba pang sektor bilang pagtutol sa exploration activities at panawagan para sa pangangalaga ng kalikasan at kabuhayan ng mga mamamayan.
