53,689 total views
Nagsagawa ang Caritas Manila ng malawakang pamamahagi ng tulong sa mga mamamayan sa Maynila na lubhang nasalanta ng bagyong Uwan.
Nito November 10, 2025, namahagi ng tulong ang Caritas Manila ng tulong sa mga residenteng nasasakupan ng Nuestra Señora Dela Soledad Parish sa San Nicholas Binondo, Parish of the Risen Christ sa Tondo at San Jose Manggagawa sa Maynila.
Ayon kay Ramona Ilucito – Social Service Development Ministry (SSDM) Volunteer Coordinator nang Nuestra Señora Dela Soledad Parish, 226 na pamilya mula sa Barangay 275 ng lungsod ng Maynila ang nabigyan ng tulong ng social arm ng Archdiocese of Manila.
“Ngayon po, pupuntahan po namin kung totoo pong nasalanta at doon po sa evacuation (centers)- siyempre po malakas po ang ulan hindi po kami agad makalabas, pinuntahan po namin kaninang umaga po ngunit wala na po ang iba dahil inilipat sila ng evacuation centers kaya ngayon po, nagpatulong po kami sa Baranggay at yun nga po, nailista na namin sila ng maayos” ayon sa panayam ng Radyo Veritas kay Ilucito.
Labis naman ang pasasalamat ni Alexandra Salazar – SSDM Coordinator sa Risen Christ Parish sa naging pamamahagi ng relief assistance ng Caritas Manila sa 90-mahihirap na pamilyang lubhang naapektuhan ng bagyo.
“Yung kagabi po na sobrang lakas po ng hangin, yung bahay po nila ay binaha po talaga, tapos yun po, na-force evacuate po sila ng Baranggay, maraming-maraming salamat po sa Caritas Manila at mabilis po yung pagtugon nila para po sa mga nasalanta po ng Bagyong Uwan,” ayon sa panayam ng Radyo Veritas kay Salazar.
Patuloy naman ang pakikipag-ugnayan ng Caritas Manila sa mga SSDM Coordinator sa ibat-ibang Parokya sa Archdiocese of Manila upang kagyat na maipadala ang tulong sa mga mamamayang nasalanta ng kalamidad.
Nakipag-ugnayan na rin ang Caritas Manila sa Santo Niño De Baseco sa Manila Port Area upang malaman ang tiyak na bilang ng mga padadalahan ng tulong na sinasabing umaabot ng 1,378 na pamilya.
