136 total views
Nagpahayag ng pakikiisa at panalangin ang Catholic Bishops’ Conference of the Philippines (CBCP) para sa mga biktima ng malakas na lindol na tumama sa Sarangani at iba pang bahagi ng Mindanao noong June 8.
Sa inilabas na mensahe ni CBCP President at Lipa Archbishop Gilbert Garcera, ipinaabot ng kapulungan ng mga obispo ang pakikiramay sa mga pamilyang nawalan ng mahal sa buhay at panalangin para sa agarang paggaling ng mga nasugatan at mga naapektuhan ng sakuna.
“We grieve with the families who have lost loved ones, pray for the speedy recovery of those who have been injured, and stand in spiritual communion with all those who have been displaced from their homes and livelihoods,” pahayag ni Archbishop Garcera.
Kabilang din sa mga ipinapanalangin ng CBCP ang mga rescue worker, medical personnel, ahensya ng pamahalaan, at mga boluntaryong patuloy na tumutugon sa pangangailangan ng mga apektadong pamayanan.
Binigyang-diin ni Archbishop Garcera na sa panahon ng kalamidad ay tinatawagan ang Simbahan na maging tanda ng pag-asa at saksi ng pagkakawanggawa para sa mga nagdurusa.
“In moments such as these, we are reminded that the Church is called to be a sign of hope and a witness of charity. As one family in Christ, we cannot remain indifferent to the suffering of our brothers and sisters. Their pain is our pain; their loss is our loss,” ayon kay Archbishop Garcera.
Kaugnay nito, hiniling ng CBCP sa lahat ng diyosesis, parokya, religious communities, at Catholic institutions sa bansa na magsama ng natatanging Panalangin ng Bayan sa mga Misa sa darating na Linggo para sa mga biktima ng lindol at sa mga nagsasagawa ng rescue at relief operations.
Nanawagan din ang kapulungan sa mga obispo na magsagawa ng ikalawang koleksyon sa mga Misa sa June 14 upang makalikom ng pondo para sa agarang ayuda at rehabilitasyon ng mga apektadong komunidad sa pamamagitan ng mga diocesan social action centers at Caritas Philippines.
“Let us continue to pray for one another and respond generously to this urgent call of Christian charity,” panawagan ni Archbishop Garcera.
