9,491 total reads
Inaanyayahan ng pamunuan ng National Shrine of Mary, Queen of Peace o EDSA Shrine ang publiko, lalo na ang mga dadalo sa “Trillion Peso March” sa darating na Setyembre 21, na makiisa muna sa pagdiriwang ng Banal na Misa bago lumahok sa kilos-protesta.
Ayon kay Fr. Jerome Secillano, Rector ng EDSA Shrine at kasalukuyang minister ng Public Affairs Ministry ng Archdiocese of Manila, mahalagang magsimula ang pagkilos sa pamamagitan ng pananalangin at pagkakaisa ng pamayanan.
“It is a Sunday. Our duty to God doesn’t cease when our duty to our country begins. Hence, I invite those who wish to join the rally to attend the twelve-noon mass at the Edsa Shrine before proceeding to the People Power Monument,” pahayag ni Fr. Secillano.
Ipinaliwanag ng pari na ang Misa ay nakatuon sa pagdarasal para sa katiwasayan, pag-asa, at kapayapaan ng bansa, at hindi bahagi ng protesta.
“We do not want the Mass, though, to have the tone of protest as it may alienate other people who only wish to pray in peace,” dagdag pa niya.
Pagkatapos ng Misa, magsisimula ang Trillion Peso March—isang malawakang pagkilos laban sa korapsyon at kawalan ng pananagutan sa pamahalaan.
Nakatakdang lumahok ang iba’t ibang sektor ng lipunan, kabilang na ang ilang lider-simbahan, upang ipanawagan ang katarungan at pagbabago.
Gaganapin ang pagtitipon sa EDSA People Power Monument sa Quezon City kasabay ng paggunita sa ika-53 anibersaryo ng deklarasyon ng Martial Law, isang makasaysayang paalala ng pang-aabuso ng kapangyarihan at ng pangangailangan para sa patuloy na pagbabantay laban sa katiwalian.
Sa pamamagitan ng pagkakaisa sa pananampalataya at pagkilos, umaasa ang simbahan na mas magiging makabuluhan ang panawagan para sa malinis na pamahalaan at maayos na kinabukasan para sa sambayanan.
