12,079 total reads
Ihaharap ng House prosecution panel sa impeachment court ang kasalukuyan at dating state auditors ng Commission on Audit o COA upang ipaliwanag ang proseso ng pag-audit sa P612.5 milyong confidential funds ni Vice President Sara Duterte, sa susunod na linggo.
Ayon kay lead prosecutor at Batangas Rep. Gerville Luistro, hihingan ng testimonya sina dating COA Intelligence and Confidential Fund Audit Office o ICFAO State Auditor Roderick Wamil at kasalukuyang State Auditor Celine May Del Campo.
“We requested for the issuance of subpoena a testificandum and subpoena duses tecum for our witnesses next week. That will be August 3, August 4, and August 5,” ayon kay Luistro.
Inaasahang ilalahad ng dalawang auditor ang naging proseso ng pagsusuri sa mga dokumento ng Office of the Vice President at Department of Education, gayundin ang mga natuklasan na naging batayan ng mga notice of disallowance na inilabas ng COA.
“So we expect to hear from the witnesses, both the former state auditor In the person of Roderick Wamil and the present state auditor, in the person of Silene May L. Del Campo, ‘yung naging proseso ng audit and whatever findings they were able to arrive at concerning the confidential fund of the OVP and the DepEd respectively,” dagdag pa ng mambabatas.
Bahagi ito ng pagpapatuloy ng paglalahad ng ebidensya ng prosekusyon kaugnay ng Article I ng impeachment complaint na tumatalakay sa sinasabing maling paggamit ng confidential funds.
Nauna nang iniharap sa impeachment court ang testimonya ng dalawang dating LandBank managers tungkol sa pag-encash ng apat na tseke ng OVP na nagkakahalaga ng kabuuang P500 milyon at tatlong tseke naman ng DepEd na umabot sa P112.5 milyon.
Sa susunod na mga pagdinig, inaasahang tututukan naman ng prosekusyon ang audit trail ng pondo at ang mga naging resulta ng pagsusuri ng COA.
Kasama rin sa ipapatawag ang isang opisyal mula sa House of Representatives Legislative Information Resources Management Department upang kilalanin ang mga dokumentong mula sa Kamara na gagamitin bilang ebidensya.
Sinabi ng prosekusyon na layunin ng mga susunod na testimonya na mabuo ang kabuuang larawan ng paglabas, paggamit, at pagsusuri ng confidential funds na pinag-uusapan sa impeachment trial.
