1,265 total reads
Nagbabala ang Diyosesis ng Imus, Cavite sa mga mananampalataya laban sa nagpapakilalang seminarista na nanghihingi ng donasyon.
Ayon sa Diocese of Imus facebook post, may kumakalat na solicitation letters sa diyosesis na humihingi ng tulong-pinansyal para sa ordinasyon sa pagiging pari.
Sa panayam ng Radio Veritas kay Vicky Alcazar- isang layko mula sa diyoses, si John Michael Castillo ay nagpapakilalang seminarista na ginagamit ang pangalan ni Fr. Bernie Gacelo, kura paroko ng Saint Jude the Apostle Parish sa Bacoor, Cavite at ilang seminarista.
“Siya [John Michael Castillo] ‘yung nanghingi sa akin ng donation para daw sa kanyang sotana. Hiningan ko siya ng katibayan na may pirma ni Fr. Bernie pero wala siyang naipakita sa akin,” pahayag ni Alcazar.
Ayon naman kay Imus Diocesan Social Action Director Father Michael Rueben Cron na mayroon din silang natanggap na ulat hinggil sa kumakalat na solicitation letter.
Pagbabahagi ni Fr. Cron na ginagamit din ni Castillo ang pangalan naman ni Fr. Danilo Tiong, kura paroko ng Saint James the Great Parish sa Imus, Cavite at ilan ding mga seminarista.
Paalala ng pari sa mga mananampalataya na sakaling makatanggap ng solicitation letter, agad na makipag-ugnayan sa mga tanggapan ng parokya o diyosesis upang matiyak na tunay ang sulat na natanggap.
Paliwanag ni Fr. Cron, hindi masamang tumulong sa mga higit na nangagailangan ngunit dapat tiyakin munang mabuti ang patutunguhan at hindi mapapahamak ang simbahan.
“Sana po ay maging matalas ang ating isip at gayundin maging mapagkawanggawa pa rin naman dahil alam nating meron talagang totoong nangangailangan at tayo’y maging instrumento ng Diyos para sa pagkakawanggawa,” pahayag ni Fr. Cron.
Maraming beses nang nagbigay ng babala ang simbahan hinggil sa pananamantala ni Castillo na gumagamit ng iba’t ibang pangalan para makapanlinlang ng kapwa.
Maliban sa Diyosesis ng Imus, umiikot din si Castillo sa iba pang diyosesis lalo na sa Metro Manila sa katulad na dahilan.
