166 total views
Hinikayat ni Novaliches Bishop Roberto Gaa, pangulo ng CBCP–Episcopal Commission on Vocation, ang mga vocation promoter na pagnilayan ang mas malalim na kahulugan ng discernment sa bokasyon.
Ito ang mensahe ng Obispo sa closing mass para sa pagtatapos ng ika-29 na Directors of Vocations in the Philippines (DVP) National Convention.
Binigyang-diin ni Bishop Gaa na ang bokasyon ay hindi nakabatay sa panandaliang damdamin kundi sa katiyakang tinatawag ng Diyos ang isang tao.
“We do not direct vocation,we only co-discern… Let our work remain challenging. Because when it is challenging, we continue to learn.” Bahagi ng mensahe ni Bishop Gaa.
Ayon sa Obispo, mahalagang maunawaan na ang papel ng mga tagapagtaguyod ng bokasyon ay hindi ang magbigay ng sagot, kundi maging gabay sa maayos at malayang pag-unawa ng mga tinatawag sa bokasyon.
Ipinaalala rin ni Bishop Gaa ang kahalagahan ng pakikinig bilang mahalagang bahagi ng paghubog sa bokasyon bilang lingkod ng Simbahan.
“It is to listen with the candidate, free from biases, free from our own preferences. It is just to listen to them, to echo their sentiments so they can clearly listen to themselves. So that in the end, they will be able to listen to the voice of God: unhindered, unhampered.” Dagdag pa ni Bishop Gaa.
Samantala, hinamon din ni Bishop Gaa ang mga dumalo na yakapin ang kanilang misyon bilang mga “masters of sacred listening” sa patuloy na paggabay sa mga tinatawag sa paglilingkod sa Simbahan.
Pinangasiwaan ng Archdiocese of Jaro ang ika-29 na Directors of Vocations in the Philippines (DVP) National Convention na nagsimula noong ika-27 hanggang ika-30 ng Abril, 2026 kung saan naihalal bilang bagong DVP National Coordinator si Rev. Fr. Nathaniel G. Gentizon katuwang si Rev. Fr. Ivan Joseph F. Feniquito bilang bagong Assistant National Coordinator & Coordinator for Diocesan Vocations Directors.
