14,553 total views
Tanggapin si Hesus sa ating puso upang mabuhay ng may pag-asa at magkaroon ng inspirasyon na bumangon sa anumang pagsubok ngayong 2024.
Sa new year message ni San Jose Nueva Ecija Bishop Roberto Mallari, inihayag ng Obispo na sa kabila ng mga suliranin ay nagkatawang tao ang Panginoong Hesu Kristo para ilagtas sa kasalanan ang sangkatauhan.
“Ito yung mahalagang mensahe, nagkatawang tao ang Diyos para sa atin at mahalaga na ito’y magbigay sa atin ng apoy para sa ganon lalu pa natin pagbutihin ang lahat ng mga ginagawa natin katulad ng pagmamahal natin sa isat-isa, sa Diyos, sa Bayan at sa mga taong ipinagkatiwala ng Diyos sa Atin,” pahayag sa Radio Veritas ni Bishop Mallari.
Ang mensahe din ng Obispo ay handog para sa mga negosyante higit na para sa mga magsasaka at iba pang manggagawa sa sektor ng agrikultura.
“Pati na yung mga farmers natin dito, yung mga magsasaka, lalu na ngayong taon, talagang hindi masyadong umani ng madami at madami parin yung nahihirapan pero hindi tayo mawawalan ng pag-asa yung laban lang, yung tuloy parin na mai-angat yung buhay ng isat-isa lalung-lalu na yung sektor ng ating mga magsasaka at nung mga kapatid nating nahihirapan,” ayon pa sa panayam ng Radio Veritas kay Bishop Mallari.
Tiwala din si Bishop Mallari na sa tulong ng matatag na pananampalalataya sa Panginoon ay mapagtatagumpayan ng kabuoan ng sektor ng ekonomiya ang mga suliranin na maaring maranasan ngayong 2024.
