7,755 total reads
Hinimok ni Manila Archbishop Cardinal Jose Advincula ang mga mananampalataya na gawing sentro ng misyon at ebanghelisasyon ang kanilang sariling pamayanan sa gitna ng mga sugat at mga hamong kinakaharap ng lipunan.
Ito ang mensahe ng Cardinal sa pagdiriwang ng ika-10 na kapistahan ng San Felipe Neri Parish sa Taytay, Rizal kung saan binigyang-diin nito ang halimbawa ni San Felipe Neri bilang “Apostol ng Roma” na naglingkod sa sariling bayan upang maging daluyan ng espiritwal na pagbabago.
Ayon kay Cardinal Advincula, hindi kinakailangang lumayo upang maging tunay na misyonero ng Simbahan.
“Hindi natin kailangang lumayo upang maging misyonero. Ang ating tahanan, pamayanan, simbahan, at lipunan ay hitik sa mga pusong sugatan, nawawalan ng pag-asa, at naghahanap ng liwanag ni Kristo,” ayon sa pagninilay ni Cardinal Advincula.
Binigyang-diin din nito na sa gitna ng mga suliranin sa bansa at daigdig ay mahalagang maging saksi ang bawat Kristiyano ng pagkakaisa, paghilom, at muling pagsilang ng pananampalataya.
“Sa gitna ng mga pagsubok at nakalulungkot na pangyayari sa ating bansa at mundo, tayo’y tinatawagan na maging mga saksing paghilom, pagkakaisa, at muling pagsilang ng pananampalataya,” dagdag pa ni Cardinal Advincula.
Paalala rin ng arsobispo na hindi kinakailangang maging tanyag o makapangyarihan upang maipahayag ang Mabuting Balita, kundi maisabuhay ito sa pamamagitan ng simpleng kabutihan at paglilingkod sa kapwa.
“Sa simpleng kabutihan, tapat na pakikipagkapwa, at masayang paglilingkod sa araw-araw, maaari nating ihatid ang liwanag ni Kristo sa iba,” ani ng kardinal.
Samantala, ibinahagi naman ni Fr. Michael Jayson Abao, SC, kura paroko ng San Felipe Neri Parish, ang pasasalamat ng pamayanan sa biyaya ng Diyos sa loob ng sampung taon ng pagiging ganap na parokya.
“Ang aming pong parokya ay ipinagdiriwang ngayon ang ikasampung kapistahan kasi sampung taon na ang aming parokya,” pahayag ni Fr. Abao sa Radyo Veritas.
Hinimok din ng pari ang mga mananampalataya na tularan si San Felipe Neri bilang patron ng kagalakan at pag-asa sa kabila ng mga pagsubok sa buhay.
“Kahit na may mga pagsubok, kahit na may mga problema, kahit na may pinagdaanan, matuto rin sana tayong maging masaya,” saad ng pari.
Ang San Felipe Neri Parish sa Taytay, Rizal ay patuloy na nagsisilbing sentro ng pananampalataya at pagmimisyon sa pamayanan sa inspirasyon ng kanilang patron na kilala bilang banal ng kagalakan.
