Kahalagahan ng mga katutubo, kinilala ni Bishop Santos

 2,054 total views

Inihayag ni Antipolo Bishop Ruperto Santos ang kahalagahan ng mga katutubo sa pamamagitan ng kanilang mga kultura, tradisyon, at ambag sa lipunan.

Ayon kay Bishop Santos, na siya ring kura paroko ng International Shrine of Our Lady of Peace and Good Voyage o Antipolo Cathedral, ang mayamang kultura ng mga katutubo ay hindi lamang bahagi ng kasaysayan kundi mahalagang bahagi rin ng pagkakakilanlan bilang isang bansa.

Gayunman, ang mga katutubong pamayanan ay nahaharap sa matitinding pagsubok tulad pagkamkam sa kanilang mga lupaing ninuno kapalit ng mapaminsalang pag-unlad.

“Their enduring spirit and heritage are vital threads in the fabric of our society. As we reflect on their invaluable presence, let us remember our shared responsibility to support and uplift our Indigenous brothers and sisters. They face unique challenges and injustices that require our collective action and compassion,” pahayag ni Bishop Santos sa panayam ng Radio Veritas.

Nananawagan ang obispo sa bawat mananampalataya, na buksan ang mga puso’t isipan at pakinggan nang may pag-unawa ang karanasan ng mga katutubong pamayanan.

Hinahamon din ni Bishop Santos ang mga kinauukulan lalo na ang mga nasa pamahalaan na bigyang-prayoridad ang kapakanan at karapatan ng mga katutubo.

“Ensure their voices are heard and their needs are met with justice and respect. Invest in their communities, protect their lands, and honor their cultural heritage,” saad ng obispo.

Hinihikayat ng obispo ang sambayanang Pilipino na magtulungan at maging liwanag ng pag-asa para sa mga katutubo upang malagpasan ang mga hamong dulot ng pananamantala sa mga likas na yamang kanilang pinakainiingatan.

“Together, we can create a world where every indigenous person is valued and respected, where their traditions are celebrated, and where their future is bright and secure. With hope and determination, let us commit to this noble cause,” hamon ni Bishop Santos.

Ginugunita ngayong Oktubre ang National Indigenous Peoples’ Month 2024 at ang ika-27 anibersaryo ng pagsasabatas sa Indigenous Peoples Rights Act of 1997.

Tema ng pagdiriwang ang “Mga Katutubo at Katutubong Dunong: Pahalagahan, Pangalagaan, at Parangalan”.

Ipagdiriwang din ng simbahan sa October 13 ang Linggo ng mga Katutubo na ang tema para sa susunod na dalawang taon ay “Lakbay-Laya: Kalakbay nang may Pag-asa sa Lupaing Ninuno”.

Pagiging huwaran ng mga katutubo sa pangangalaga sa kalikasan, kinilala ni Bishop Aseo

 2,749 total views

Binigyang-diin ni Tagum Bishop Medil Aseo ang mahalagang gampanin ng simbahan sa pagkilala at pagtugon sa pangangailangan ng mga katutubo, lalo na sa pangangalaga ng kalikasan.

Ayon kay Bishop Aseo, dapat kilalanin ang kultura at ambag ng mga katutubo, na likas na mga tagapangalaga ng mga likas na yaman, at nagpapakita ng pamumuhay kaisa ang kalikasang biyaya ng Diyos sa sangkatauhan.

Ang mensahe ng obispo ay kaugnay sa pagdiriwang ng National Indigenous Peoples’ Month ngayong Oktubre at Indigenous Peoples’ Sunday ngayong October 13—ang pagtatapos ng pagdiriwang ng Season of Creation sa Pilipinas.

“Though our responsibility as stewards of God’s creation remains ongoing—it has been a time for us to reflect more on our shared duty to care for the world entrusted to us. The indigenous peoples, especially in their respective areas have long embodied this stewardship. In their simple way of life, they remind us of the importance of creation, something we must protect as we face the growing ecological crises,” pahayag ni Bishop Aseo sa panayam ng Radio Veritas.

Aniya, sa pagtatapos ng Panahon ng Paglikha ngayong taon, ito’y naging pagkakataon upang higit na pagnilayan ang kolektibong tungkuling pangalagaan ang nag-iisang tahanan.

Sinabi ng obispo na ang mga katutubo, sa payak at tradisyonal na pamumuhay, ay nagsisilbing huwaran sa wastong pagpapahalaga at pangangalaga sa kalikasan sa kabila ng lumalalang krisis pangkalikasan.

Ibinahagi naman ni Bishop Aseo na ang diyosesis, sa pamamagitan ng Tagum Social Action Ministry at pakikipagtulungan ng Caritas Philippines, ay gumagawa ng makabuluhang hakbang upang tugunan ang pangangailangan ng mga katutubo, lalo na sa Caraga Region sa bahagi ng Maragusan, Davao de Oro.

Kabilang sa mga proyekto ay ang pagbibigay ng malinis at ligtas na suplay ng tubig sa mga katutubong pamilya sa mga malalayo at liblib na lugar.

“Access to clean, safe water is not just a basic human need—it is a fundamental human right. This initiative holds significance beyond the Diocese of Tagum. It is only of the things that can be accomplished when the Church, together with its partners, stands in solidarity with the most vulnerable,” ayon kay Bishop Aseo.

Tema ng Linggo ng mga Katutubo sa susunod na dalawang taon ang “Lakbay-Laya: Kalakbay nang may Pag-asa sa Lupaing Ninuno”.

Nakasaad sa Laudate Deum ni Pope Francis na bagamat mahalaga ang mga pansariling pagkilos, ang tunay na solusyon ay mangyayari sa pamamagitan ng maayos at wastong pagbabago sa mga patakaran at programa ng pamahalaan at mga institusyon.

Ika-4 na Bike for Kalikasan, isasagawa sa Visayas Region

 2,759 total views

Mahigit 250 siklista at mga tagapagtanggol ng kalikasan ang nagtipon-tipon para sa 3rd Bike for Kalikasan sa Cagayan de Oro City noong October 5.

Naging matagumpay ang gawaing inorganisa ng Caritas Philippines katuwang ang Archdiocese of Cagayan de Oro kung saan kabilang sa mahalagang bahagi ang makasaysayang deklarasyon ng climate emergency sa arkidiyosesis.

Nagagalak naman si Caritas Philippines president, Kidapawan Bishop Jose Colin Bagaforo sa suporta ng mga mananampalataya at biking associations dahil sa pagpapakita ng pagkakaisa para sa isinusulong na inisyatibo.

“Our 3rd Caritas Bike For Kalikasan was a success, embodying the Season of Creation’s theme of ‘Hope and Act for Creation’. The enthusiasm shown by participants from the Archdiocese of Cagayan de Oro, the Diocese of Malaybalay, and various biking associations demonstrates our collective commitment to environmental stewardship,” pahayag ni Bishop Bagaforo.

Inilunsad din sa gawain ang Koalisyon sa Nagkahiusang Lihuk para sa Kinaiyahan, isang samahan ng civil society at non-governmental organizations na magtataguyod ng mga programa para sa pangangalaga ng kalikasan at pagtugon sa climate emergency.

Umaasa naman si Cagayan de Oro Archbishop Jose Cabantan na ang mga inisyatibong katulad ng bike caravan ay higit pang mapalakas at mapalawak upang maisakatuparan ang layuning pangalagaan ang nag-iisang tahanan.

“This bike event is part of our activities aimed at caring for our common home. We hope this sparks more activities, programs, and advocacies that focus on protecting our environment, as this is the call of our time,” saad ni Archbishop Cabantan.

Patuloy ring sinusuporatahan ng inisyatibo ang anim na pangunahing hakbang para sa kalikasan na tinukoy sa ika-128 CBCP Plenary Assembly noong Hulyo.

Kabilang dito ang pagpapalakas ng integral ecology ministries, pagsuporta sa pandaigidigang gawain para sa Season of Creation, pagtalikod sa mga industriya ng pagmimina at iba pang mapaminsalang negosyo, pagpapatupad ng mga wastong polisiya sa donasyon, pagtugon sa plastic pollution, at pagtataguyod ng renewable energy sa pamamagitan ng 10 Million Solar Rooftops Challenge.

Samantala, binabalak naman ng social at advocacy arm ng simbahan na gawin ang susunod na bike caravan sa Visayas Region.

“To those who witnessed our cycling event, the message is simple: we ride for the sake of our environment. May this be the time for us to act decisively to save our common home,” ayon kay Bishop Bagaforo.

Ihinto ang pamumuhunan sa fossil fuel, panawagan ng Simbahan sa SMC

 3,814 total views

Nananawagan sa San Miguel Corporation (SMC) ang Simbahang Katolika sa Pilipinas at stakeholders ng kumpanya na ihinto na ang pamumuhunan sa fossil fuels at lumipat na sa renewable energy.

Sa pamamagitan ng Caritas Philippines, nagkaisa ang mga mga kasapi, iba’t ibang organisasyon, at social action centers ng simbahan, at stakeholders ng SMC upang hikayatin ang kumpanyang makiisa sa layunin ng Paris Agreement at labanan ang epekto ng umiiral na climate crisis.

“We, members of the Catholic Church and stakeholders of San Miguel Corporation (SMC), urge San Miguel Corporation to take concrete and significant steps to align with the Paris Agreement, particularly by moving away from fossil fuels and transitioning to renewable energy,” ayon sa pahayag.

Binigyang-diin sa pahayag na patuloy na pinalalawak ng kumpanya ang coal power plants at fossil gas operations, partikular na sa Verde Island Passage na itinuturing na “center of the center of marine shore fish biodiversity” sa buong mundo.

Magugunita naman ang naganap na oil spill kung saan sangkot ang kumpanya, sa Oriental Mindoro noong February 2023 at sa Bataan noong July 2024, na nagdulot ng labis na pinsala sa kapaligiran, kabuhayan ng libo-libong mangingisda, at kalusugan ng mga pamayanan.

“These developments show the damages of the environment, livelihood, and health brought by SMC’s fossil fuel expansion. We, members of the Church, who have a responsibility towards our Common Home, are saddened that the resources we have entrusted to the company are being used to fuel such destruction,” saad ng mga kasapi ng simbahan at stakeholders ng korporasyon.

Hinihikayat naman ang nasabing multinational conglomerate na maglunsad ng mga plano upang makiisa sa pandaigdigang layuning mapanatili ang temperatura ng mundo ng mas mababa sa 1.5-degrees Celsius, at magdesisyon na talikuran ang mga fossil fuel asset at mamuhunan sa mas malinis na enerhiya.

Hinihiling din ang pagiging tapat at malinaw ng SMC sa pamamahala sa mga kaakibat na panganib ng fossil fuel projects, at ang pagtugon sa “Net-Zero commitment”.

Muli namang nanindigan ang simbahan sa pangakong pagtalikod sa mga korporasyon at financial institutions na bigong makalikha ng mga polisya alinsunod sa Paris Agreement.

“We, members of the Church and shareholders of the corporation, urge the company to take the right steps and act according to its capability to contribute to protecting Our Common Home, as this is the only way we can ensure global solidarity and social justice,” giit ng pahayag.

Taong 2019 nang magkasundo ang mga obispo sa Pilipinas na mag-divest sa mga negosyo at proyektong gumagamit ng marumi at mapaminsalang enerhiya. Higit pa itong pinaigting ng CBCP noong 2022, at hinikayat ang paghinto sa pamumuhunan sa maruming industriya, at sa halip ay ilaan sa pagpapaunlad ng renewable energy sector.

Kabilang sa mga lumagda at nakiisa sa panawagan ang pitong shareholders kabilang ang Archdiocese of Manila at Diocese of Imus, at 76-stakeholders na kinabibilangan ng mga social at ecology arm ng iba’t ibang diyosesis sa buong Pilipinas.

Opisyal ng CBCP, dismayado sa NCIP

 6,559 total views

Iginiit ng Catholic Bishops’ Conference of the Philippines-Episcopal Commission on Indigenous Peoples ang kahalagahan ng pagbibigay ng ancestral domain titles sa mga katutubo.

Ayon kay Bontoc-Lagawe Bishop Valentin Dimoc, chairman ng komisyon, mahalaga para sa mga katutubo ang pagkakaroon ng Certificate of Ancestral Domain Title (CADT) upang sila’y maging katuwang sa pangangalaga sa mga likas na yaman at matiyak na sila’y makakatanggap ng tamang bahagi ng benepisyo mula sa paggamit ng kanilang mga yaman.

Sinabi ni Bishop Dimoc na sa pamamagitan ng CADT, mapapangalagaan ang mga katutubo laban sa mga malalaking kumpanyang nagdudulot ng pang-aabuso at labis na pinsala sa mga pamayanan at lupaing ninuno.

“Meron naman silang title na hindi nakasulat, ito ‘yung native title, pero kailangan gawin ‘yan na nakasulat para mas maprotektahan sila sa development aggresions…So that they may be co-responsible in protecting their resources and the proper use of their resources for the development of people,” pahayag ni Bishop Dimoc sa panayam ng Radio Veritas.

Ibinahagi ng obispo na sa kabila ng pagkakaroon ng Indigenous Peoples Rights Act (IPRA) mula pa noong 1997, mas mababa pa sa 50-porsyento ang natapos ng National Commission on Indigenous Peoples (NCIP) pagdating sa pagbibigay ng opisyal na titulo sa mga lupaing ninuno.

Ito ang dahilan kaya’t maraming katutubong pamayanan ang nanganganib na mawala ang mga lupain at pasukin ng mga malalaking korporasyon nang walang kaukulang pahintulot.

“Maraming mga communities who are endangered or dispossessed of their lands. Why? Because they were not protected by a tenurial instrument na appropriate sa kanila, gaya ng ancestral domain title. So, less than 50-percent pa ‘yung accomplishment ng NCIP on the issuance of ancestral domain titles. Ayan ‘yung nakakatakot kasi pwedeng pasukin ‘yan ng mga developers without even a tenurial instrument,” paliwanag ni Bishop Dimoc.

Panawagan ni Bishop Dimoc sa pamahalaan na bigyang-prayoridad, lalo ng NCIP at mga mambabatas, ang pagtukoy sa hangganan ng mga lupaing ninuno nang sa gayo’y maibigay sa kanila ang karapatang magkaroon ng opisyal na titulo ng kanilang mga pag-aaring lupain.

“Those who are in the government, especially the NCIP and the legislators who are approving the budgets, the NCIP should prioritize the delineation of the ancestral domains of the indigenous peoples para magkaroon ng CADT. Because without the title, then they are exposed to dangers,” saad ni Bishop Dimoc.

Ginawa ni Bishop Dimoc ang pahayag kasabay ng paglulunsad sa National Indigenous Peoples Month 2024 sa pamayanan ng mga katutubong Isneg sa Sitio Bubog, Barangay Nabuangan, Conner, Apayao, sa pangunguna ng Apostolic Vicariate of Tabuk katuwang ang CBCP-ECIP.

Batay sa tala ng NCIP, tinatayang humigit-kumulang 15-milyon ang populasyon ng mga katutubo sa buong bansa, na nahaharap sa iba’t ibang hamon upang mapangalagaan ang kanilang mga lupaing ninuno laban sa mapaminsalang epekto ng mga proyekto at pag-unlad.

Pagsusulong sa kapakanan ng mga IP, pinagtibay ng simbahan at LGU’s

 6,653 total views

Tiniyak ng Pamahalaang Panlalawigan ng Kalinga ang patuloy na pakikipagtulungan at pagsuporta sa mga proyekto ng simbahan para sa kapakanan ng mga katutubo.

Ayon kay Kalinga Governor James Edduba, layunin ng pakikipag-ugnayan na ipalaganap ang mahalagang misyon ng simbahan sa paghubog ng mga katutubong pamayanan, lalo na sa aspeto ng edukasyon.

Binanggit ni Edduba na ang simbahan ang nagpakilala at naghatid ng edukasyon sa mga katutubong pamayanan ng Kalinga, kaya karamihan sa mga ito ay naging mga Kristiyano.

“Most of the people here in the province of Kalinga are Catholic community. Because sila ‘yung unang pumunta dito, sila ‘yung nag-introduce ng education, including the spiritual education of the people here. Even some of the community projects we started were also started by the church. It’s just a matter of continuing and sustaining it sana para lalo sanang matulungan itong mga katutubo,” pahayag ni Edduba sa panayam ng Radio Veritas.

Naniniwala ang gobernador na ang pagkakaroon ng maayos na ugnayan sa pagitan ng simbahan at pamahalaan ay maituturing na mabuting pamamahala, sapagkat higit nitong natutugunan ang mga pangangailangan ng kanilang nasasakupan.

Ibinahagi ni Edduba ang mga kaugaliang pinahahalagahan ng mga taga-Kalinga na “paniyaw, ngilin, at bain,” na nangangahulugang paggalang sa Diyos, kalikasan, at pamayanan, na makakatulong sa pagpapatupad ng mabuting pamamahala.

“We are trying to revive this as a means of further inculcating in people a love for God and a love for the community… Sabi ko nga, ‘pag ang isang leader has a good Christian values, siguradong ‘yung gobyerno niya, it’s a good governance,” ayon kay Edduba.

Ang pahayag ni Edduba ay kaugnay ng paglulunsad ng National Indigenous Peoples Month 2024 sa Sitio Bubog, Barangay Nabuangan, Conner, Apayao, sa pangunguna ng Apostolic Vicariate of Tabuk katuwang ang Catholic Bishops’ Conference of the Philippines-Episcopal Commission on Indigenous Peoples (CBCP-ECIP).

Dumalo rin sa nasabing gawain sina Tabuk Bishop Prudencio Andaya Jr., CBCP-ECIP chairman Bontoc-Lagawe Bishop Valentin Dimoc, CBCP-ECIP executive secretary Tony Abuso, mga pari ng Bikaryato ng Tabuk, at mga katutubong Isneg.

Ipagdiriwang naman sa ika-13 ng Oktubre ang Indigenous Peoples’ Sunday, kasabay ng pagtatapos ng pagdiriwang ng Pilipinas ng Season of Creation.

Tema ng Linggo ng mga Katutubo para sa susunod na dalawang taon ang “Lakbay-Laya: Pilgrims of Hope in Ancestral Domain.”

Our Lady of Miraculous Medal parish, nilooban

 9,704 total views

Naglabas ng pahayag ang Parish Pastoral Council ng Our Lady of the Miraculous Medal Parish (OLMMP) sa Project 4, Quezon City kaugnay sa insidente ng pagnanakaw sa parokya, kagabi.

Napag-alamang nilooban at ninakawan ang parokya nang buksan ang simbahan nitong umaga ng Setyembre 27, kung saan kinuha sa kinalalagyan at sapilitang binuksan ang donation drop boxes.

“Ikinalulungkot po naming ibalita na kagabi, ang ating simbahan ay nilooban at napagnakawan. Ang mga donation drop boxes ay kinuha sa kinalalagyan nito, sapilitang binuksan at kinuha ang laman nitong mga love offering envelopes/contributions. Ito po ay natuklasan kaninang umaga sa pagbubukas ng simbahan,” ayon sa opisyal na pahayag ng OLMMP.

Agaran naman itong iniulat ng parokya sa Barangay Marilag at sa Quezon City Police Station 8 kung saan patuloy na iniimbestigahan ang insidente.

Tiniyak naman ng pamunuan na agad na ipaaalam sa publiko ang magiging resulta ng imbestigasyon ng mga kinauukulan para na rin sa kaalaman at kaligtasan ng lahat mula sa mga mapagsamantala.

“Pinaaalalahanan ang lahat na maging alerto at dagdagan ang pag-iingat laban sa mga mapagsamantala at mga akyat-bahay na kumakalat sa ating pamayanan,” ayon sa pahayag.

Umaasa naman ang parokya sa pamamagitan at panalangin ng Mahal na Birhen Medalya Milagrosa upang mailayo ang lahat sa anumang kapahamakan.

Mag-ingat sa Holloween costumes at decorations na may halong kemikal, babala sa mamamayan

 9,673 total views

Binalaan ng BAN Toxics ang publiko laban sa pagbili ng Halloween costumes at decorations na maaaring may sangkap na nakalalasong kemikal ngayong nalalapit na ang paggunita sa Undas o All Saints’ Day at All Souls’ Day.

Ayon kay BAN Toxics Campaigner Thony Dizon, bukod sa nakakatakot na hitsura ng mga produkto, dapat ding maging maingat ang mga magulang sa posibleng epekto nito sa kalusugan ng mga bata.

“Parents should be wary of the creepy and scary presence of toxic chemicals in children’s products which may lead to various health problems,” ayon kay Dizon.

Sa market monitoring, bumili ang BAN Toxics ng anim na Halloween mask at sinuri ang mga ito gamit ang chemical analyzer, at natuklasan na ang mga maskara ay naglalaman ng nakalalasong lead na umabot sa 1,130 parts per million (ppm) at cadmium na umabot naman sa 160 ppm.

Bukod pa rito, bigo rin ang mga produktong sundin ang umiiral na product labeling standards na itinatakda ng Republic Act 10620, o ang Toy and Game Safety Labeling Act of 2013.

Ipinag-uutos dito ang pagsunod ng toy manufacturers sa labeling requirements, kabilang ang License to Operate number mula sa Food and Drug Administration (FDA), at iba pang mga mahahalagang detalye.

Batay naman sa Department of Environment and Natural Resources (DENR) Chemical Control Order for Lead and Lead Compounds, mahigpit na ipinagbabawal ang paggamit ng lead sa paggawa at pagbebenta ng mga laruan at school supplies.

Habang ang cadmium naman ay may nakalalasong epekto sa bato, skeletal at respiratory system, at itinuturing na human carcinogen na nagdudulot ng cancer.

Panawagan naman ng BAN Toxics sa FDA at Department of Trade and Industry na magsagawa ng post-market surveillance at kumpiskahin ang mga produktong walang wastong label at hindi rehistrado sa pamilihan.

“Preventing the spread of unsafe children’s products in the market should be the core action not just of a single agency but a concerted effort by all stakeholders, including local government units and the general public,” dagdag ng grupo.

Una nang binigyang-diin ng Simbahang Katolika na hindi kaugalian ng isang Kristiyano ang pagsusuot ng mga nakakatakot na kasuotan upang ipagdiwang ang Halloween kundi dapat ilaan ang panahon para mag-alay ng panalangin at parangalan ang mga banal ng simbahan at mga yumaong mahal sa buhay.

Caritas Philippines, nanindigan laban sa Kaliwa dam

 10,234 total views

Muling pinagtibay ng social at advocacy arm ng Catholic Bishops’ Conference of the Philippines ang paninindigan para sa pangangalaga sa mga likas na yaman at karapatan ng mga katutubong pamayanan.

Ito ang binigyang-diin ng Caritas Philippines sa paggunita ngayong araw sa Save Sierra Madre Day.

Ayon sa institusyon, ang Sierra Madre, bukod sa pagiging tahanan ng iba’t ibang uri ng puno, hayop at mga ilog, ito ri’y tahanang ninuno ng iba’t ibang katutubong pamayanan at isang mahalagang likas na yaman ng bansa.

“As we observe the Season of Creation, the theme ‘to hope and act with creation’ resonates deeply with our ongoing efforts to preserve the Sierra Madre mountain range…We stand in solidarity with these communities, recognizing their invaluable role as the true stewards of this land,” pahayag ng Caritas Philippines.

Patuloy na tinututulan ng Caritas Philippines ang mga mapaminsalang proyekto sa Sierra Madre na banta sa likas na balanse ng bulubundukin at mga katutubo.

Kabilang dito ang kontrobersyal na Kaliwa Dam project, na bagama’t layuning maibsan ang krisis sa tubig sa Kalakhang Maynila, ay maglalagay naman sa panganib sa mga katutubong pamayanan at ang likas na yaman ng kabundukan.

Iginiit ng social arm ng simbahan na masasabing tunay ang hangaring pag-unlad kapag iginagalang ang karapatan ng kalikasan at ang dignidad ng tao, sa halip na isantabi ang mga ito at patuloy na sirain ang kapaligiran at palayasin ang mga katutubo.

Hamon naman ng Caritas Philippines sa pamahalaan at mga kinauukulan na humanap ng alternatibong solusyon sa mga pangangailangan ng bansa na hindi lubhang makakaapekto sa kapakanan at Karapatan ng mga likas na yaman at mga katutubo.

“By saving the Sierra Madre, we are not just preserving a mountain range; we are protecting a way of life, safeguarding our water resources, and securing a sustainable future for generations to come,” saad ng Caritas Philippines.

Tinagurian ang Sierra Madre bilang “the back bone of Luzon”, ang pinakamahabang mountain range sa Pilipinas na mayroong 500 kilometro ang haba at binabagtas ang mga lalawigan mula Cagayan hanggang Quezon.

Taong 2012 nang ideklara ni dating Pangulong Benigno Aquino III ang September 26 ng bawat taon bilang Save Sierra Madre Day upang paigtingin ang pangangalaga sa bulubundukin at alalahanin ang mga naging biktima ng matinding pagbaha dulot ng pananalasa ng bagyong Ondoy noong 2009.

Earth Hour, isasagawa ng Archdiocese of Davao

 10,209 total views

Isasagawa ng social arm ng Archdiocese of Davao ang sabayang pagpapatay ng mga ilaw at kagamitang de-kuryente bilang bahagi ng pagdiriwang sa Season of Creation ngayong taon.

Hinihikayat ng Davao Archdiocesan Social Action Center ang mga mananampalataya para sa Earth Hour sa September 28, mula alas-8 hanggang alas-9 ng gabi bilang paraan ng pagsusulong na mabawasan ang epekto ng carbon energy na mapanganib sa kalusugan at kalikasan.

Bagamat karaniwang isinasagawa tuwing Marso ng bawat taon, ang Earth Hour ay makabuluhang hakbang upang patuloy na maisulong ang pagbibigay-pahinga sa daigdig na labis nang napipinsala dahil sa epekto ng krisis sa klima bunsod ng paggamit ng maruming enerhiya.

Paraan din ito ng arkidiyosesis upang mapaigting ang kamalayan lalo ng mga kabataan sa pangangalaga sa inang kalikasan para sa kapakanan ng mga susunod na henerasyon.

Tema ng Season of Creation 2024 ang “To Hope and Act with Creation”, at isasagawa sa Pilipinas hanggang ikalawang Linggo ng Oktubre kasabay ng pagdiriwang sa Indigenous Peoples Sunday.

Pagpapahinto sa PAREX project, panawagan ng Diocese of Pasig

 11,371 total views

Hinimok ng Diocese of Pasig Ministry on Ecology ang mamamayan na makiisa sa panawagan sa pangangalaga at pagpapanumbalik sa mga ilog para sa kapakanan ng susunod na mga henerasyon.

Ayon kay Ecology ministry director, Fr. Melvin Ordanez, ang mga ilog ay nagbibigay-buhay, hindi lamang sa mga nilalang na umaasa rito, kundi maging sa aspeto ng espiritwal na pamumuhay.

Ang panawagan ni Fr. Ordanez ay kaugnay sa pagdiriwang ng World Rivers Day (WRD) 2024 kung saan kabilang sa mga pinagtutuunan ay ang Ilog Pasig na nahaharap sa banta ng proyektong Pasig River Expressway (PAREX) Project.

“We should cherish this beautiful gift, a symbol of life and hope. May we be good stewards in restoring the beauty of the Pasig River,” pahayag ni Fr. Ordanez sa panayam ng Radio Veritas.
Hinamon ng pari ang bawat isa na gampanan ang tungkulin bilang mga katiwala ng mga likas na yaman tulad ng mga ilog, bilang pagpapakita ng malasakit at pasasalamat sa mga biyayang handog ng Diyos.

Pagbabahagi ng pari, saksi sa kasaysayan ang Pasig River, maging ang iba pang mga ilog sa bahagi ng Taguig City at Pateros sapagkat dito dumaan ang mga misyonero upang maipalaganap ang pananampalataya sa diyosesis.

“The history and faith brought by the rivers in Pasig, Pateros, and Taguig is significant, as these are the paths taken by the first missionaries in our diocese,” ayon kay Fr. Ordanez.
Nitong September 22 ay nakatuwang ng grupong Ilog Pasiglahin ang ecology ministry ng diyosesis sa inilunsad na programa para sa pagdiriwang ng WRD 2024.

Tema ng gawain ang “Ilog para sa Lahat: Makatao at Makalikasan; PAREX, Wakasan na!”, na layong sama-samang itaguyod ang makatao at makakalikasang pag-unlad para sa tunay at inklusibong rehabilitasyon ng Ilog Pasig.

Una nang nagpahayag ng pagtutol ang Diocese of Pasig hinggil sa PAREX project dahil sa pinsalang maaaring idulot nito sa Ilog Pasig, lalo na sa mga pamayanan, kultura, at kapaligiran ng buong Metro Manila.

Nagkakahalaga ng P95-bilyon ang proyekto at may habang higit 19-kilometro na babagtasin ang kahabaan ng Pasig River mula Maynila patungong Taguig City.