Lumaban sa martial law, binigyang pugay ng TFDP

 99 total views

Hinihimok ng Task Force Detainees of the Philippines ang mga Pilipino na patuloy na alalahanin ang mga matapang na lumaban para sa demokrasya at kalayaan ng bansa mula sa kadilimang dulot ng Batas Militar.

Ito paalala ni TFDP chairperson Rev. Fr. Christian Buenafe, O.Carm., sa paggunita ng ika-52 anibersaryo ng deklarasyon ng Martial Law ni dating Pangulong Ferdinand Marcos Sr. sa ika-21 ng Setyembre, 2024.

Ayon sa TFDP, naaangkop lamang na bigyang pagkilala at bigyang pugay ang tagumpay ng mga indibidwal at kilusan na na nagsusulong ng karapatang pantao sa bansa.

Bilang paggunita rin ng Task Force Detainees of the Philippines ngayong taon sa ika-50 anibersaryo, binigyang diin ng organisasyon ang pagpapahalaga sa kalayaan at katarungan.

“Inaalala natin ang tapang ng mga lumaban sa kadiliman ng Batas Militar, kasabay ng pagdiriwang sa mga tagumpay ng kilusan para sa karapatang pantao sa Pilipinas. Gayundin, sa ika-50 anibersaryo ng Task Force Detainees of the Philippines (TFDP), binibigyang-pugay natin ang walang pagod na pagsisikap ng mga tagapagtanggol ng karapatang pantao na nagbigay-daan sa kalayaan at katarungan.” Bahagi ng pahayag ng TFDP.

Binigyang diin naman ng organisasyon ang patuloy na pakikibaka at pagsusulong ng isang lipunan na umiiral ang karapatang pantaon, pagkakapantay-pantay, at katarungang panlipunan para sa lahat.

“Patuloy ang pakikibaka tungo sa isang lipunan kung saan ang pagkakapantay-pantay, katarungang panlipunan, at karapatang pantao ay kinikilala at iginagalang ng lahat.” Ayon pa sa TFDP.

September 21, 1972 nang magdeklara ng Martial Law ang rehimen ni dating Pangulong Ferdinand Marcos Sr., na winakasan ng mapayapang People Power Revolution noong taong 1986 na naging inspirasyon ng iba’t ibang bansa upang isulong ang kani-kanilang kasarinlan sa pamamagitan ng pagkakaisa sa halip na karahasan.

Taong 1974 ng itinatag ng noo’y Association of Major Religious Superiors in the Philippines (AMRSP) ang human rights organization na Task Force Detainees of the Philippines (TFDP) upang makapagpaabot ng tulong at ayuda sa mga political prisoners ng Batas Militar sa ilalim ng diktaduryang Marcos Sr..

Bukod sa legal na tulong ay nagkakaloob rin ang TFDP ng moral at pang-espiritwal na paggabay sa mga political prisoners at kanilang pamilya, kasabay ng masusing pagdokumento sa mga kaso ng paglabag sa karapatang pantao kabilang na ang kaso ng torture, summary arrest, killings, illegal detention, at force disappearances.

Walang VIP sa batas

 3,218 total views

Nanawagan ang social action arm ng Catholic Bishops’ Conference of the Philippines (CBCP) sa mamamayan na bantayan ang pag-usad ng kaso ni Kingdom of Jesus Christ founder Pastor Apollo Quiboloy.

Ito ang panawagan ni Caritas Philippines President, Kidapawan Bishop Jose Colin Bagaforo makaraang sumuko si Quiboloy sa mga awtoridad kasama ang iba pang akusado.

Ayon sa Obispo, mahalaga ang pagiging mapagbantay at pakikialam ng bawat mamamayan upang matiyak ang pananaig ng katarungan para sa mga biktima ng pang-aabuso at paglabag sa karapatang pantao ni Quiboloy.

“We urge everyone to be watchful as the case progresses. It is through collective vigilance that we ensure justice is served and human dignity is protected.” Bahagi ng pahayag ni Bishop Bagaforo.

Binigyang diin naman ng Obispo na dapat na maging patas ang mga otoridad sa pagpapatupad ng batas kung saan hindi dapat na tratuhing VIP o bigyan ng pambihirang pabor si Quiboloy.

Iginiit ni Bishop Bagaforo na kinakailangan na maging mahigpit ang mga otoridad sa pagpapatupad ng proseso ng batas at hindi dapat na magkaroon ng anumang kasunduan o pakikipagkasundo sa kampo ni Quiboloy at iba pang mga kasama akusado.

“The law must apply equally to all. We trust there will be no VIP treatment, and that justice will proceed without favoritism… We hope there were no under-the-table deals, particularly with the Department of the Interior and Local Government (DILG). Transparency is essential, and the process must remain uncompromised,” Dagdag pa ni Bishop Bagaforo.

Kinilala naman ng Caritas Philippines ang pagsusumikap ng mga kawani ng Philippine National Police at Armed Forces of the Philippines na mahanap si Quiboloy upang maisakatuparan ang pagbibigay katarungan sa lahat ng kanyang mga biktima ng karahasan at pang-aabuso lalo’t higit sa mga kabataan at mga kababaihan.

“We commend the Philippine National Police (PNP) and the Armed Forces of the Philippines (AFP) for their dedication in ensuring this important step toward justice” Ayon pa kay Bishop Bagaforo.

Nagpaabot naman ng pananalangin si Bishop Bagaforo para sa lahat ng mga pamilya at biktima ni Quiboloy na patuloy na naghahanap ng katarungan at nagsusumikap na malagpasan ang kanilang mga pinagdaanan.
Bukod sa paghilom para sa mga biktima ay ipinapanalangin din ng Obispo si Quiboloy at ang mga kasapi ng Kingdom of Jesus Christ upang magkaroon ng lakas at bukas na pag-iisip na tanggapin ang katotohanan kaugnay sa mga alegasyong pang-aabusong kinakaharap ni Quiboloy.

“At the heart of this case are victims who have suffered immensely. Their protection, care, and recovery must be prioritized, along with the support of their families, who carry a heavy burden… We offer prayers for healing, not only for the victims but also for Pastor Quiboloy and his followers, that they may find clarity and strength to face the truth.” Pagbabahagi pa ni Bishop Bagaforo.

Sumuko si Quiboloy sa Intelligence Service of the Armed Forces of the Philippines (ISAFP) noong ika-8 ng Setyembre, 2024 matapos na magbigay ng 24-hour ultimatum ng PNP bago pasukin ang mga mahahalagang gusali ng KOJC compound sa Davao City.

Ika-9 naman ng Setyembre, 2024 ng pormal nang humarap sa Quezon City Regional Trial Court si Quiboloy para sa mga kasong sexual abuse of minor at child cruelty kung saan may piyansang 180-libo sa sexual abuse habang 80-libo naman sa child cruelty.

Nakatakda ding iharap si Quiboloy sa Pasig Regional Trial Court para non-bailable na human trafficking case.

Inilipat sa Quezon City ang paglilitis kay Quiboloy mula Davao City makaraang aprubahan ng Korte Suprema ang kahilingan ng prosekusyon upang maiwasan ang impluwensya ng akusado sa mga korte sa judicial region.

Technical education sa drug rehabilitated dependents, pinaboran ng CHR

 3,609 total views

Nagpahayag ng suporta ang Commission on Human Rights (CHR) sa panukalang batas na naglalayong mabigyan ng pagsasanay at edukasyong teknikal ang mga rehabilitated drug dependents bilang bahagi ng pagbibigay ng pangalawang pagkakataon upang makapagbagong buhay.

Ayon kay CHR Chairperson Richard Palpal-latoc, malaki ang maitutulong ng batas ni Senator Raffy Tulfo na Senate Bill (SB) No. 2721, o “An Act Mandating The Technical Education And Skills Development Authority To Design And Implement Technical-vocational Education And Training And Livelihood Programs Specifically For Rehabilitated Drug Dependents And Appropriating Funds Therefor” upang magabayan ang pagbabagong buhay ng mga dating nalulong sa ipinagbabawal na gamot.

Pagbabahagi ng CHR ang naturang panukalang batas ay maituturing din na isang paraan ng pagtataguyod sa mga karapatang pantao na nasasaad sa Konstitusyon kabilang na ang pagkakaroon ng patas na opurtunidad ng bawat isa para sa kalidad na edukasyon, ang pagkakataon na makapagtrabaho, at ang pagpapahalaga ang dignidad ng isang indibidwal sa lipunan.

Ipinaliwanag ng CHR na mahalaga ang mga katulad na inisyatibo at panukalang batas upang maipakita ng pamahalaan ang pagiging inklusibo at bukas nito sa pagtulong sa mga dating nalulong sa ipinagbabawal na gamut.

“We take note of the effort made by Sen. Raffy T. Tulfo to introduce this proactive bill. Through initiatives like this, the government demonstrates its commitment to a more inclusive and rehabilitative approach to drug addiction. We urge the swift passage of SB No. 2721 in order to move closer to a society where every individual is given the opportunity to recover, rehabilitate, and reintegrate with dignity and hope.” Dagdag pa ng CHR.

Matatandaang sa kasagsagan ng marahas na implementasyon ng War on Drugs ng nakalipas na administrasyong Duterte na nagsimula noong 2016 ay naglunsad ang iba’t ibang mga diyosesis at institusyon ng Simbahan ng Church-based drug rehabilitation program upang magkaloob sa mga sumukong drug dependents at sa kanilang mga pamilya ng counselling, spiritual formation, skills formation training at arts, culture at sports activities para sa holistic development ng mga drug dependents.

Una ng inihalintulad ng Kanyang Kabanalan Francisco na bagong uri ng pang-aalipin ang drug addiction at iba pang uri ng adiksyon na dapat tugunan ng bawat bansa sa pamamagitan ng edukasyon at rehabilitasyon.

Paghubog sa katapatan ng mga botante, prayoridad ng PPCRV

 5,064 total views

Naniniwala ang Parish Pastoral Council for Responsible Voting (PPCRV) na bukod sa pagtiyak ng katapatan ng sistema ng halalan sa bansa ay mahalaga ring tutukan ang paghuhubog sa katapatan ng mismong mga botante.

Ito ang binigyang diin ni PPCRV Executive Director Jude Liao kaugnay sa patuloy na suliranin ng vote buying at vote selling tuwing panahon ng halalan sa bansa.

Ayon kay Liao, mahalagang tutukan ang paggabay sa mga botante sa pamamagitan ng values formation program na muling paiigtingin ng PPCRV bilang pangunahing tagapagbantay ng Simbahang Katolika sa pagkakaroon ng isang maayos at matapat na eleksyon sa Pilipinas.

Pagbabahagi ni Liao, napapanahon ng mamulat ang mga botante sa kahalagahan ng paninindigan para sa bansa sa pamamagitan ng hindi pagbibenta ng kanilang boto para sa panandaliang pagkakaroon ng salapi mula sa mga kandidato.

“More than the system its actually also the voters, diba grabe pa rin po ang vote buying natin sa Pilipinas aminin man natin sa hindi. Kaya talagang napakahalaga yung formation program and values formation program natin ay bumaba [hanggang sa mga simpleng mamamayan] para talagang makita nila na ang vote buying bibilhin yung boto mo para may makain kasi diba laging survival ang issue, but sana makita natin bilang Pilipino na long-term.” Bahagi ng pahayag ni Liao sa Radio Veritas.

Paliwanag ni Liao, dapat na maunawaan ng mga botante na sa kabila ng tukso na dulot ng anumang halaga na ibibigay ng mga kandidato ay hindi matatawaran nito ang pang-matagalang epektong dulot ng pagbibenta ng kanilang boto.
“Ang isipin natin pagdating sa election hindi lang short-term na porket inabutan tayo ng ganito o ganun, dahil pwedeng may inabot nga ngayon pero yung long-term naman ay hindi ganun kaganda ang magiging karanasan natin, so yun yung isa sa mga bagay na tiningnan namin at syempre samo’t dalangin din namin sa PPCRV.” Dagdag pa ni Liao.

Bilang pagpapaigting sa values development program ng PPCRV ay nakatakdang ilunsad sa ika-10 ng Setyembre, 2024 ganap na alas-3 ng hapon sa Dusit Thani Hotel sa Makati ang TIBOK PINOY na layuning hubugin ang mga botante sa pagiging isang mabuting, matapat at modelong mamamayan bilang paghahanda na rin sa nalalapit na 2025 Midterm Elections sa susunod na taon.

Una ng binigyang diin ni 1987 Constitutional Framer at Novaliches Bishop-emeritus Teodoro Bacani Jr. na kapwa may pananagutan ang mga pulitiko at botante sa talamak na Vote Buying tuwing sasapit ang halalan kung saan iginiit din ng Obispo na walang obligasyon ang sinuman na tupdin o tuparin ang isang immoral na kasunduan tulad na lamang ng Vote Buying na tila pagbibenta ng bayan sa kamay ng mga pulitiko na pansariling interes lamang ang pinahahalagahan.

Alinsunod na Omnibus Election Code nangunguna sa listahan ng election offense ang Vote Buying at Vote Selling kung saan nasasaad sa nasabing batas na sakaling mapatunayan ay mahaharap ang bumili ng boto at mga kinasangkapan nito gayundin ang humingi o tumanggap ng anumang halaga sa pagkakakulong ng isa hanggang anim na taon, bukod dito maari din madisqualify ang isang pulitiko mula sa public office at maaring mawalan ng karapatan na bumoto.

TIBOK PINOY, ilulunsad ng PPCRV

 5,513 total views

Tiniyak ng Parish Pastoral Council for Responsible Voting (PPCRV) ang pagsasakatuparan sa mandato bilang pangunahing tagapagbantay ng Simbahang Katolika sa pagkakaroon ng isang maayos at tapat na eleksyon sa Pilipinas.

Ito ang ibinahagi ni PPCRV Media and Communications Director Ana De Villa Singson sa puspusang paghahanda ng PPCRV sa nalalapit na 2025 Midterm Elections.

Inihayag ni Singson na kabilang sa pagtutuunan ng PPCRV ang paghuhubog ng mga model Filipino o mamamayang maka-bayan, maka-Diyos at matapat na katangiang dapat ding taglayin at hanapin ng mga botante sa mga ihahalal na opisyal ng pamahalaan.

Ayon kay Singson, hindi lamang sapat na turuan ang mga botante na pumili ng karapat-dapat na mga kandidato sa halip ay dapat din nilang taglay ng mga botante ang mga mabubuting katangiang hinahanap sa mga lingkod bayan.

“Napag-isipan namin ang voters kung tinuturuan lang namin kung paano pumili ng kandidato that only happens every 3-years so sayang naman yung mga years in between. Not only that, napapansin namin yung mga voters it’s very hard for them, for you to tell them to choose somebody who is honest, somebody who is maka-bayan, somebody who is maka-Diyos kung wala silang karakter na ganun mismo. So, to be able to vote wisely we have to be the best possible citizen that you can be, you have to be a model Filipino.” Bahagi ng pahayag ni Singson sa Radio Veritas.

Paliwanag ni Singson, kung taglay ng bawat Pilipino ang mabubuting katangian bilang isang indibidwal ay mas madali ring kilatisin ng mga botante ang mga katangiang ito sa mga kandidato.

Sinabi ni Singson na mahalagang muling pagtuunan ng pansin ang values formation na tila unti-unting nawawala sa lipunan.

“We are hoping to form model Filipinos because if we have model Filipinos hahanapin din nila ang mga model na mga characteristics sa mga lider na iboboto nila, so the hope and the prayer is that a model Pilipino will be a model voter and because of that hopefully we can vote in model leadership also. Matagal po ito, hindi po ito mabilis but importante pong pagtuunan ng pansin and values formation kasi nawala na eh, parang nawala na sa eskwela at saka ang dami ng mga kagawiang nangyari na medyo nawawala na po ang values, so we want to put it back po itong values.” Ayon kay Singson.

Kaugnay nito, ilulunsad ng PPCRV ang TIBOK PINOY na magsisilbing values development program ng Parish Pastoral Council for Responsible Voting para sa papalapit na halalan sa bansa.

Nakatakda ang paglulunsad ng TIBOK PINOY sa ika-10 ng Setyembre, 2024 ganap na alas-3 ng hapon sa Dusit Thani Hotel sa Makati.

Matatandaang Obtubre taong 1991 ng opisyal na ilunsad ang PPCRV bilang isang independent, non-profit at non-partisan organization na may mahigit sa 700,000 volunteers mula sa may 86 na diyosesis sa buong bansa.

Pag-amyenda sa Migrant Workers and Overseas Filipino Act, suportado ng CHR

 5,546 total views

Supotado ng Commission on Human Rights ang panukalang pagpapalawig sa Emergency Repatriation Fund (ERF) sa pamamagitan ng pag-amyenda sa Republic Act (RA) No. 8042 o mas kilala bilang Migrant Workers and Overseas Filipinos Act.

Nakapaloob sa House Bill 09388 na inihain ni OFW Partylist Rep. Marissa “Del Mar” Magsino ang pagbibigay ng awtoridad sa batas para sa pagtatatag ng mga pansamantalang tirahan o temporary shelters ng mga Overseas Filipino Workers (OFW) sa mga host country at halfway houses sa Pilipinas para sa mga repatriated OFWs.

Ayon sa Komisyon ng Karapatang Pantao, napapanahon ang naturang panukala lalo na sa gitna ng patuloy na mga nagaganap na kaguluhan, natural na mga sakuna at iba pang krisis sa iba’t ibang bahagi ng daigdig.

Pagbabahagi ng CHR, mahalaga ang naturang hakbang upang matiyak ang kaligtasan, makatao at marangal na kalagayan ng mga OFW maging sa gitna ng iba’t ibang sitwasyon.

“In the face of ongoing global conflicts, natural disasters, and other crises in different parts of the world, the Commission recognizes that these initiatives are essential in ensuring that our kababayans are provided with safe, humane, and dignified living conditions during their most vulnerable times.” Bahagi ng pahayag ng CHR.

Alinsunod sa Article XIII, Section 3 ng 1987 Constitution mandato ng Estado na itaguyod ang kapakanan at mabigyang ng ganap na proteksyon ang mga Overseas Filipino Workers (OFW) saan mang panig ng mundo na nakapaloob din sa Article 25 of the Universal Declaration of Human Rights na pagbibigay halaga sa karapatan at dignidad ng isang indibidwal na makapamuhay ng ligtas at walang pag-aalinlangan sa kanyang kaligtasan.

Iginiit ng CHR na nararapat na maging handa at mapagbantay ang pamahalaan sa kapakanan ng mga OFW na nagbibigay ng malaking tulong sa pag-unlad ng ekonomiya ng bansa.

“With wars and disasters displacing countless individuals, it is important that the State remains vigilant in safeguarding the rights and welfare of Filipino migrant workers. The CHR fully supports the passage of HB 09388 and calls on our legislators to prioritize the well-being of our OFWs—ensuring that no Filipino is left behind.” Ayon pa sa CHR.

Sa datos ng pamahalaan, umaabot na sa 10-milyon ang mga Filipino na nagtatrabaho at naninirahan sa ibayong dagat na unang kinilala ng Santo Papa bilang ‘smugglers of faith’ dahil sa masigasig na pagpapahayag ng pananampalataya at pagiging katuwang ng Simbahan sa pagpapalaganap ng Mabuting Balita sa mga bansang kanilang pinaglilingkuran.

20 dambana at simbahan, itinalagang Jubilee churches ng Archdiocese of Manila

 11,597 total views

Umabot sa mahigit 20 mga simbahan at dambana sa Arkidiyosesis ng Maynila ang itinalagang Jubilee Churches ng arkidiyosesis para sa nakatakdang Ordinary Jubilee of the Year 2025.

Ayon sa Kanyang Kabunyian Manila Archbishop Jose Cardinal Advincula, mahalagang samantalahin ng mga mananampalataya ang biyayang hatid ng pananalangin at pagbisita sa mga itinalagang jubilee churches bilang paggunita sa idineklarang Jubileo ni Pope Francis para sa susunod na taong 2025.

Bilang higit na pagpapalawig sa misyon ng Simbahan na maging daluyan ng habag, awa at pagmamahal ng Panginoon sa bawat nilalang ay kabilang sa partikular na tinukoy ng arkidiyosesis ang mga Simbahan na maaring bisitahin ng iba’t ibang sektor ng lipunan upang higit na maging epektibo sa pagbabahagi ng tunay na diwa ng Taon ng Jubileo at ng iba pang mga sakramento lalo’t higit ang sakramento ng kumpisal.

Kabilang sa mga partikular na sektor na tinukoy ng Arkidiyosesis ng Maynila ang mga opisyal ng pamahalaan; mga may karamdaman, kapansanan at health care workers; mga kabataan at mag-aaral; mga katekista at ibang church volunteer workers; mga mahihirap at ulila; mga Persons Deprived of Liberty at kanilang pamilya; mga migrants at refugees; mga digital communicators; mga kabilang sa iba’t ibang mga denominasyon; mga nagsusulong ng pangangalaga sa kalikasan; mga matatanda; mga negosyante at mamumuhunan; mga young professionals; mga guro; at mga manggagawa.

Samantala, idineklara rin bilang Jubilee Churches ang ilang mga pambansang dambana at minor basilica na matatagpuan sa Arkidiyosesis ng Maynila na kinabibilangan ng Minor Basilica of the Immaculate Conception o mas kilala bilang Manila Cathedral; National Shrine of Saint Jude Thaddeus; Minor Basilica and National Shrine of the Black Nazarene o mas kilala bilang Quiapo Church; National Shrine of Saint Michael & The Archangels; at Minor Basilica of San Sebastian o Our Lady of Mount Carmel Parish.

Attached List of Jubilee Churches:

Samantalahin ang pagsibol ng katotohanan.

 11,533 total views

Ito ang panawagan ni Arnold Janssen Kalinga Foundation founder Rev. Fr. Flavie Villanueva, SVD para sa mga kawani ng Pambansang Pulisya ng Pilipinas(Philippine National Police) sa ibinunyag ni Police Lt. Col. Jovie Espenido na pagpapatupad ng quota at reward system sa marahas na implementasyon ng laban kontra illegal na droga ng administrasyong Duterte.

Ayon sa Pari, hindi na dapat mabahala ang magigiting na pulis na itama ang mga naganap na mali sa ilalim ng administrasyong Duterte dahil tapos na ang panahon ng mga Duterte.

Ipinaliwanag ni Fr. Villanueva na hindi dapat na hayaan ng mga pulis na tuluyang mabansagan ang PNP na “malaking crime syndicate” na kumikilos sa tiwali at baluktot na utos ng mga opisyal ng nakalipas na administrasyon.

“Sa mga magigiting na pulis na ngayon ay marahil nababagabag sa kanilang mga nadidinig na mga balita tungkol sa nagdaang patayan at kampanya ng giyera laban sa droga, tapos na po ang panahon ng mga Duterte. Ito ay isa sa pinakamalagim, kung hindi pinakamadugo na kabanata ng ating kasaysayan, ayaw po natin at huwag po sana natin ilagay ang ating sarili, ang malinis nating pangalan sa peligro at sa bansag na tayo ay may dugo sa ating mga kamay. Maari pa itong baguhin, maari pa tayong magpahayag at kung anuman ang mali na ating nagawa dahil tayo ay sumunod sa tiwali at sa baluktot na utos, maari pa natin itong bigyan ng katarungan.” Bahagi ng pahayag ni Fr. Villanueva sa Radyo Veritas.

Ibinahagi ng Pari, founder ng Program Paghilom para sa mga naiwang kaanak ng mga biktima ng extra-judicial killings dulot ng War on Drugs, na maari pang magbago ang mga magigiting na alagad na batas at makatulong sa pagbibigay katarungan sa mga biktima ng War on Drugs.

Iginiit ni Fr. Villanueva na mahalaga ang pagtestigo at pagpapatotoo ng mga pulis sa kanilang naging pagsunod sa pagsasakatuparan ng marahas na implementasyon ng War on Drugs ng dating pangulong Duterte at dating PNP Chief na ngayo’y Senator Ronald ‘Bato’ Dela Rosa.

Ayon sa Pari, napapanahon na samantalahin ang pagsibol ng katotohanan upang mabigyan ng katarungan ang lahat ng mga biktima ng War on Drugs sa pamamagitan ng pagsiwalat sa mga naganap noong nakalipas na administrasyong Duterte.

“Sa ngalan po bilang Pilipino, bilang maka-Diyos at sa mga kaluluwa na pinatay, pinaslang na walang kalaban laban, maari pa natin silang bigyan ng katarungan sa inyong pagtestigo, sa inyong pagpapatotoo na kayo ay ginamit lamang, inutusan lamang, binayaran lamang upang maisakatupan ang sakim na plano sa pangunguna ni Rodrigo Duterte at ni Senator Bato Dela Rosa. Hindi po kayo dapat na matakot sapagkat ito na po ang katotohanan sumisibol at patuloy ng inilalabas, pagsamantalahan po natin ang katotohanang ito at tayo ay pumanig kasama ang mga ating mga kababayan na naninindigan sa katotohanan at higit sa lahat ang Diyos na mapagkalinga sa tuwina.” Dagdag pa ni Fr. Villanueva.

Batay sa isinumiteng affidavit ni Espenido sa pagharap nito sa House Quad Committee ay ibinunyag ng opisyal ang pag-iral ng quota at reward system sa Philippine National Police sa ilalim ng war on drugs ng administrasyong Duterte kung saan nagtakda ng 50 hanggang 100 na mapapatay na drug suspek kada bawat araw habang nasa P20,000.00 naman ang reward na matatanggap ng mga pulis.

Matatandaang taong 2016 ng sinimulan ni Fr. Villanueva ang Program Paghilom upang makatulong at makapagpaabot ng suporta sa lahat ng mga naiwang mahal sa buhay at kapamilya ng mga nasawi sa War on Drugs ng adminisrasyong Duterte.

Upang mapalawak ang misyon ng Program Paghilom ay itayo ng AJ Kalinga Foundation ang Dambana ng Paghilom – Himlayan ng mga biktima ng EJK sa La Loma Cemetery sa Caloocan na nagsisilbi ring kauna-unahang EJK Memorial site.

Sa kasalukuyan, mahigit sa 300 ang mga pamilyang kinakalinga ng Program Paghilom ng Arnold Janssen Kalinga Foundation na nagkakaloob ng iba’t ibang tulong at suporta para sa naiwang asawa, magulang at anak ng mga biktima ng EJK sa bansa.(reyn)

No one is above the law

 12,751 total views

Binigyang diin ng isang opisyal ng Catholic Bishops’ Conference of the Philippines na walang sinuman ang mas nakahihigit o nakatataas sa batas.

Ito ang bahagi ng pahayag ni Kidapawan Bishop Jose Colin Bagaforo, pangulo ng Caritas Philippines kaugnay sa sitwasyon sa Davao City dulot ng patuloy na paghahanap ng mga pulis kay Kingdom of Jesus Christ (KOJC) leader Apollo Quiboloy na nahaharap sa iba’t ibang kaso ng pang-aabuso at paglabag sa karapatang pantao.

Ayon sa Obispo na siya ring chairman ng CBCP-Episcopal Commission on Social Action Justice and Peace, mahalaga ang pananaig ng batas at katarunang panlipunan lalo na’t walang sinuman ang mas nakatataas sa batas.

pinaliwanag ni Bishop Bagaforo, kaakibat ng pagpapatupad ng batas ang patiyak sa patuloy na pagbibigay halaga sa dignidad at karapatang pantao ng bawat indibidwal. “We renew our appeal to all those involved: no one is above the law, and justice must prevail, not through violence, but through adherence to the rule of law and respect for human dignity” Bahagi ng pahayag na ipinaabot ni Bishop Bagaforo sa Radio Veritas.

Muli ring nanawagan si Bishop Bagaforo kay Quiboloy na harapin ang kanyang mga kaso upang hindi na tumagal pa ang pagdurusa ng kanyang mga biktima na patuloy na naghahanap ng katarungan mula sa kanilang sinapit.

Giit ng Obispo, mahalaga ang pagsunod sa batas hindi lamang ni Quiboloy kundi maging ng kanyang mga tagasuporta na pawang mga miyembro ng Kingdom of Jesus Christ (KOJC) na nagdudulot sa pagkaantala ng pagpapatupad ng prosesong legal ng mga alagad ng batas.

“Evasion of arrest or delay of justice merely prolongs the pain and suffering of the victims who have bravely come out into the open… It is crucial that Mr. Quiboloy and his supporters respect the rule of law and allow the legal process to take its due course without interference.” Dagdag pa ni Bishop Bagaforo.

Pinaalalahanan naman ni Bishop Bagaforo ang mga alagad ng batas na huwag gumamit ng dahas sa pagpapatupad ng batas sa halip ay tuwinang isaisip at bigyang halaga ang kaligtasan at dignidad ng bawat isa.

“We recognize the difficult task faced by our law enforcement personnel, but it is essential that they conduct their operations with care, ensuring the safety and dignity of everyone involved,” Ayon pa kay Bishop Bagaforo.

Matatandaang nagkaroon ng tensyon sa pagitan ng pulisya at mga tagasunod ni Quiboloy sa Kingdom of Jesus Christ compound sa Davao City matapos ang panibagong operasyon na pagsisilbi ng arrest warrant laban kay Quiboloy.

Una na ring nagpahayag ng pagkadismaya ang Caritas Philippines sa pagpanig at tila pagsuporta ng ilang mga senador kay Quiboloy na nahaharap sa iba’t ibang kaso ng pang-aabuso at kabilang sa mga “wanted persons” ng US Federal Bureau of Investigation (FBI) dahil sa patung-patong na kaso ng human at sex trafficking ng mga kababaihan at menor de edad.