11,436 total reads
Ito ang mariing pahayag ni Fr. Joel Saballa sa isinagawang misa at pagtitipon ng mga pamilya ng mga biktima ng war on drugs, kasabay ng pagdinig sa International Criminal Court (ICC) kaugnay sa mga kasong crimes against humanity laban kay dating Pangulong Rodrigo Duterte.
Ayon kay Fr. Saballa, sa gitna ng matinding pagdurusa at pagkawala ng mahal sa buhay, hindi dapat manaig ang kawalan ng pag-asa sapagkat ang Diyos ay Diyos ng katotohanan at hustisya.
“Ang Diyos ay hindi bulag, hindi bingi, hindi tahimik. Siya ay Diyos ng katotohanan, ng habag at hustisya,” ayon kay Fr. Saballa.
Binigyang-diin ng pari na ang pananampalataya ay hindi nangangahulugang pananahimik sa harap ng mali, kundi paninindigan para sa tama na may pusong may habag.
“Ang pananampalataya ay hindi bulag. Hindi ito tahimik sa harap ng mali,” diin ng pari.
Sa kanyang pagninilay, inihayag ni Fr. Saballa na ang sakit ng mga magulang na nawalan ng anak ay walang katumbas na salita upang maipaliwanag, subalit tiniyak niyang hindi nag-iisa ang mga pamilya sa kanilang pagdadalamhati.
“Sa bawat luha at sugat na hindi maipaliwanag, si Kristo’y naroon, tahimik, ngunit buhay na gumagabay sa atin,” dagdag pa ni Fr. Saballa.
Ipinaalala rin ng pari na ang paghahanap ng katarungan ay hindi dapat maging daan ng galit kundi ng liwanag ng biyaya ng Diyos.
“Hindi magtatapos sa krimen ang inyong karanasan. Magtatapos ito sa katarungan,” saad ng pari.
Samantala, ipinaliwanag naman ni Atty. Gian Miko Arabejo, tagapagsalita ng iDefend, ang proseso ng pagdinig sa ICC partikular ang confirmation of charges hearing kung saan tatalakayin ang saklaw ng mga paratang laban sa dating pangulo.
Ayon kay Arabejo, mahalagang marinig ang panig ng mga biktima sa pagdinig at tiniyak nilang magpapatuloy ang kanilang paninindigan hanggang makamit ang hustisya.
“Hindi po trabaho ng gobyerno ang pumatay ng kanilang citizen,” giit ni Arabejo.
Dagdag pa ng abogado, ang bawat akusado ay may karapatan sa due process, subalit iginiit niyang ang parehong karapatang ito ang ipinagkait sa maraming nasawi sa kampanya kontra droga.
Patuloy namang nananawagan ang mga grupo ng malasakit at panalangin para sa mga pamilya ng biktima, kasabay ng pag-asa na ang paglalakbay ngayong panahon ng Kuwaresma ay maging daan tungo sa panibagong pagbangon at makatarungang kapayapaan.
