10,963 total views
Hinikayat ng Catholic Bishops’ Conference of the Philippines – Episcopal Commission on Health Care (CBCP-ECHC) ang publiko na makiisa sa “Ligtas-Tigdas” vaccination drive ng Department of Health (DOH) upang mapigilan ang pagkalat ng tigdas sa bansa.
Ayon kay CBCP-ECHC chairman, Imus Bishop Reynaldo Evangelista, hindi itinuturo ng Simbahan na umasa lamang sa panalangin kundi gawin din ang nararapat upang mapangalagaan ang kalusugan.
Ipinaliwanag ni Bishop Evangelista na mahalaga ang paglapit sa mga dalubhasa sa kalusugan upang makaiwas sa sakit, sapagkat ang panalangin ay dapat samahan ng pagkilos.
“Nasa Diyos ang awa, na sa tao ang gawa. Kung wala tayong pagkilos, wala tayong pagsisikap para maiwasan ang sakit, dadapuan talaga tayo ng sakit,” pahayag ni Bishop Evangelista.
Dagdag pa ng obispo, biyaya ng Diyos ang kaalaman at kakayahan ng mga doktor at health workers kaya nararapat lamang na tangkilikin ang mga programang makatutulong sa pag-iwas sa sakit.
Hinikayat ni Bishop Evangelista ang mga magulang at tagapag-alaga na tiyaking mababakunahan ang kanilang mga anak upang magkaroon ng karagdagang proteksyon laban sa tigdas at maiwasan ang posibleng komplikasyon nito.
“Hindi natin masasabi kung anong mangyayari sa darating na panahon. Sa pamamagitan ng vaccination na ito, ay magkakaroon ng pangontra ang katawan, ang bawat mga bata at indibidwal para magkaroon ng tigdas,” saad ni Bishop Evangelista.
Batay sa pinakahuling ulat ng DOH, umabot sa 5,123 ang kaso ng tigdas at rubella mula Enero 1 hanggang Disyembre 27, 2025, mas mataas ng 32% kumpara sa 3,880 kaso noong 2024, kung saan karamihan ay mga batang limang taong gulang pababa na hindi nabakunahan.
