2,888 total reads
Nagpahayag ng kahandaan ang Parish Pastoral Council for Responsible Voting (PPCRV) na suportahan ang plano ng Commission on Elections (COMELEC) na pagsasama o integration ng voters’ education sa K-12 curriculum.
Ayon kay PPCRV National Coordinator Dr. Arwin Serrano, maging ang PPCRV ay mayroong binubuong module na magsilbing gabay sa paghuhubog ng mga kabataang makabayan at mulat sa kahalagahan ng demokrasya at halalan sa bansa.
Ipinaliwanag ni Serrano na mas higit na tinututukan ng PPCRV ang pagsusulong ng pagiging makabayan ng mga kabataan upang mas madaling magpaliwanag sa kahalagahan at kasagraduhan ng halalan sa bansa.
“Yes [we’ll support COMELEC] in fact were also coming out with our own module kaya gusto din naming yan which ever ang gagamitin basta’t huwag lang sana po-focus masyado sa eleksyon, kasi yung sa module namin will focus more on the patriotism or love of country, hindi masyado sa eleksyon kasi eleksyon madaling matutunan yun.” pahayag ni Serrano sa Radyo Veritas.
HIgit na tinututukan ng PPCRV ang pagbibigay ng kaalaman sa mga kabataan sa kahalagahan ng demokrasya kung saan kaakibat nito ang pagkakaroon ng regular na halalan sa bansa, at ang matalinong pagpili ng mga lider na magbibigay direksyon sa hinaharap ng bansa.
Nilinaw naman ng PPCRV na anuman ang nakapaloob sa module na isusulong ng COMELEC para sa integration ng voters’ education sa K-12 curriculum ay nakahanda silang umagapay at makibahagi sa mga programa ng ahensya.
“Were focusing dun sa importance kung bakit tayo nagkakaroon ng regular elections, bakit kinakailangang regular yung elections, bakit mahalaga yung mga binoboto natin makakahubog doon sa direksyon ng ating bansa at saka ng ekonomiya, yan yun aming magiging more focus, hindi masyado dun sa election, so I don’t know about the module na ipipresent ng COMELEC but I think hindi naman siguro kami nagkakalayo ng contents niyan, hopefully we could integrate from each other’s views.” Dagdag pa ni Serrano.
Matatandaang kabilang sa mga inihayag na plano ng COMELEC sa naganap na National Election Summit ang planong pagsasama o integration ng voters’ education sa K-12 curriculum upang maagang mamulat ang mga kabataan sa kahalagahan at kasagraduhan ng halalan sa bansa.
Pagbabahagi ni Serrano kaisa ng COMELEC ang PPCRV sa pagnanais na higit na mabuksan ang kamalayan ng mga kabataan sa kahalagahan ng halalan maging sa murang edad pa lamang.
