16,581 total reads
Nanawagan ang EcoWaste Coalition ng sama-samang pagkilos upang mapanatiling ligtas ang kalusugan ng mga kababaihan sa pagkakalantad sa mercury na makikita sa mga produktong pampaganda ng kutis.
Ito ang panawagan ng grupo bilang pakikiisa sa pagdiriwang ng International Women’s Day.
Ayon kay EcoWaste national coordinator Aileen Lucero, dapat sumunod sa mahigpit na panuntunan ang pamahalaan, mga negosyo, kabilang na ang mga online sellers, at mga mamimili upang mapigilan ang pag-aangkat, pamamahagi, at pagbebenta ng mga ilegal na skin lightening products na mayroong mercury.
Iginiit ni Lucero na maaaring magdulot ng panganib sa kalusugan ng mga kababaihan lalo na sa mga nagdadalantao ang paggamit ng mga produktong mayroong mapanganib na kemikal na karaniwang naaapektuhan ay ang kidneys, nervous system, at balat.
“Women of child-bearing age are particularly sensitive to the harmful effects of mercury, and exposure to this toxic chemical during pregnancy may increase the risk of serious health problems for the baby in the womb, including brain damage, blindness, deafness, and congenital malformations,” pahayag ni Lucero.
Ilan sa mga sintomas ng mercury poisoning ang pagbabago ng panlasa at pandinig, paglabo ng paningin, pamamanhid, at depresyon.
Hinamon naman ni Lucero ang Bureau of Customs at National Bureau of Investigations, na higit pang tutukan ang pagbabantay upang mapigilan ang pagpupuslit ng mga cosmetic product na karamiha’y mula sa China, Pakistan, at Thailand.
Dagdag pa ng grupo ang apela sa Food and Drug Administration makipagtulungan sa mga lokal na pamahalaan upang mahigpit na maipatupad ang ASEAN Cosmetic Directive, Minamata Convention on Mercury, at iba pang mga panuntunan para matiyak ang kaligtasan ng mga kinasasakupan mula sa mga ilegal na produkto.
“We need our local leaders to keep their cities and municipalities safe from these poisonous cosmetics that can endanger the health of their constituents, women and children in particular, as well as pollute the environment,” ayon kay Lucero.
Nakasaad sa Katuruang Panlipunan ng Simbahan na bagamat sang-ayon ang simbahan na kumita ang isang mamumuhunan, mas makabubuti na ang negosyo nito’y hindi nagdudulot ng kapahamakan sa kalusugan ng mamamayan at kalikasan.
