4,093 total reads
Nanawagan ang Kalikasan People’s Network of the Environment (Kalikasan PNE) na panagutin ang Department of Environment and Natural Resources (DENR) at mga operator kaugnay ng patuloy na sunog at pagkalat ng nakalalasong usok mula sa Navotas Sanitary Landfill.
Ayon sa Kalikasan PNE, sumiklab ang sunog noong ika-10 ng Abril na nagresulta sa sapilitang paglikas ng mahigit 300 residente pagsapit ng ika-14 ng Abril, habang makalipas ang ilang linggo, nananatili pa rin ang usok na umaabot sa iba’t ibang lugar sa Metro Manila at mga karatig-lalawigan.
Iginiit ng grupo na ang Navotas Sanitary Landfill, na dating kontrolado ni Reghis Romero II at ngayon ay hawak ng San Miguel Aerocity Inc. sa ilalim ng San Miguel Corporation ni Ramon Ang, ay itinuturing na halimbawa ng negosyong nakasandig sa pagsasamantala at pagsusulong ng mapaminsalang proyekto.
“Ito ay tahasang paglapastangan sa karapatan ng mamamayan sa malinis na hangin at ligtas na kapaligiran, at malinaw na halimbawa ng kawalang-katarungang pangkapaligiran laban sa maralita at mga mangingisda,” pahayag ng Kalikasan PNE.
Tinukoy rin ng grupo ang kapabayaan ng DENR sa mahigpit na pagpapatupad ng Republic Act 9003 o Ecological Solid Waste Management Act, sa gitna ng ulat na maraming landfill ang lampas na sa kapasidad at may banta ng pagtagas ng leachate at pagbuga ng methane gas.
Inihalintulad ng Kalikasan PNE ang insidente sa mga naunang pangyayari sa Binaliw landfill sa Cebu at Rodriguez landfill sa Rizal, na nagpapakita ng kakulangan ng pamahalaan sa epektibong pamamahala ng solid waste at pangangalaga sa kalusugan ng publiko.
Binigyang-diin din ng grupo na sinasamantala ng administrasyong Marcos Jr. ang mga insidente sa Binaliw, Rodriguez, at Navotas upang isulong ang “waste-to-energy” incinerators, na nagiging paraan ng pagkakakitaan ng basura kapalit ng panganib sa buhay at kabuhayan ng maralita.
“Sa halip na ayusin ang sahod at kundisyon sa paggawa, sinisisi pa ang karaniwang mamamayan sa pagdami ng basura at single-use plastics; gayong malinaw na bunga ito ng hindi sapat at hindi nakabubuhay na sahod na nagtutulak sa kanila sa pinakamurang produkto, kahit nakabalot sa plastik,” ayon sa Kalikasan PNE.
Dahil dito, iginiit ng Kalikasan PNE ang agarang pagpapatigil sa mapanganib na operasyon ng mga landfill, pagbibigay ng sapat na serbisyong medikal at kompensasyon sa mga apektadong komunidad, at papanagutin ang mga pribadong operator at opisyal ng pamahalaan na may kaugnayan sa insidente.
Una nang iginiit ni Kalookan Bishop Pablo Virgilio Cardinal David na dapat managot ang mga may responsibilidad sa insidente kung mapapatunayang may paglabag sa batas, at hinikayat ang publiko na gamitin ang kanilang karapatang magsampa ng kaukulang kaso laban sa mga lumalabag.
