8,791 total reads
Inilaan ng namapayapang si Pope Francis ang intensyon ng pananalangin para sa buwan ng Mayo para sa kapakanan at kalagayan ng mga manggagawa.
Bahagi ng panawagan ng yumaong punong pastol ng Simbahang Katolika ang pananalangin para sa pagkakaroon ng ligtas na working environment ng bawat manggagawa sa buong daigdig kung saan tuwina ring nabibigyang halaga ang dignidad ng bawat isa.
Ipinapanalangin rin ni Pope Francis ang pagbibigay ng makataong pagpapahalaga sa kapakanan ng bawat manggagawa na nagsasakripisyo at nagsusumikap para sa kapakanan ng kanilang mga pamilya.
May For working conditions Let us pray that through work, each person might find fulfillment, families might be sustained in dignity, and that society might be humanized.
Para sa buong taon ay naglalagtag ng iba’t ibang partikular na intensyon at layunin si Pope Francis kung saan kada buwan ay hinihiling ng Santo Papa ang pakikiisa sa pananalangin ng bawat isa.
May mga pagkakataon rin na nagdaragdag ng pangalawang hangarin o intensyon sa pananalangin ang Santo Papa na may kaugnayan sa kasalukuyang mga sitwasyon o mga agarang pangangailangan, tulad ng tulong sa sakuna o kalamidad sa iba’t ibang bansa.
Ipinagkatiwala ni Pope Francis ang mga intensyon na ito sa Pope’s Worldwide Prayer Network na isang organisasyon na nagsisikap na hikayatin ang mga Kristiyano na tumugon sa panawagan ng Santo Papa at palalimin ang kanilang pang-araw-araw na buhay pananalangin.
Napapanahon din ang inilaang intensyon sa pananalangin ni Pope Francis ngayong buwan ng Mayo sa magkaalinsabay na paggunita ng Pilipinas ang Labor Day o Araw ng Paggawa at paggunita kay San Jose Manggagawa, lingkod ng Diyos na kanyang inatasan ng isang napakahalagang gawain, hindi lamang ang pagkakarpentero kundi ang gawain na maging tagapag-alaga ng anak ng Diyos.
Sa social doctrine of the church, karapatan ng bawat manggagawa ang pagkalooban sila ng tamang sahod at benepisyo at hindi dapat samantalahin ang kanilang kahinaang ipaglaban ang kanilang karapatan bilang manggagawa at bilang isang tao.
