3,760 total reads
Binigyang-diin ni Diocese of Lucena Ministry on Ecology director, Fr. Warren Puno na hindi maaaring manahimik ang Simbahan sa harap ng lumalalang katiwalian sa bansa.
Ayon kay Fr. Puno, ang mga umiiral na suliranin sa lipunan ay hindi lamang usaping pulitikal at pang-ekonomiya kundi isang malinaw na kasalanan laban sa Diyos at sa sambayanan.
Paliwanag ng pari, ang katiwalian ay tuwirang paglabag sa ika-pitong utos ng Diyos na ‘Huwag kang magnanakaw’, sapagkat ang perang kinukurakot mula sa kaban ng bayan ay perang dapat nakalaan para sa mamamayan, lalo na sa mga mahihirap.
“Ang korupsyon ang ugat ng malalang kahirapan, kakulangan ng serbisyong panlipunan, at pagkasira ng tiwala sa pamahalaan. Ang pangunahing biktima ay ang mga walang laban—ang mga mahihirap na natatanggalan ng pagkakataong makinabang sa yaman ng bansa,” pahayag ni Fr. Puno.
Dagdag pa ni Fr. Puno, tungkulin ng Simbahan bilang tinig ng mga walang tinig na tawagin sa pananagutan ang mga tiwali, palakasin ang loob ng mamamayan, at itaguyod ang katarungan.
Iginiit ng pari na ang pananahimik ay pakikiisa sa kasamaan, habang ang pagtindig laban dito ay pakikibahagi sa misyon ni Kristo.
Panawagan naman ni Fr. Puno sa mga lingkod-bayan na magsilbi nang may integridad at katapatan; sa sambayanan na maging mapanuri at huwag maging bahagi ng katiwalian; at sa mga mananampalataya na isabuhay ang pananampalataya sa gawaing panlipunan at pakikibaka para sa katarungan.
Hinamon din ng pari ang Simbahan na maging huwaran ng pagiging tapat at may pananagutan upang maging makabuluhan ang tinig nito laban sa katiwalian.
“Ang korupsyon ay sugat sa kaluluwa ng bayan. Kailangang sugpuin ito sa pamamagitan ng pagkakaisa, pananagutan, at pagbabalik-loob sa Diyos,” ayon kay Fr. Puno.
