23,259 total reads
Dapat gamitin ni Pangulong Ferdinand Marcos Jr. ang kanyang ikaapat na State of the Nation Address (SONA) na ipakita ang malinaw na pangako ng administrasyon sa paglutas ng mga kagyat na isyung pambansa.
Ayon kay Fr. Joel Saballa ng Caritas Novaliches, mahalagang detalyado ang mga kongkretong hakbang ng ehekutibo sa pagtugon sa mga suliraning ito.
Kabilang sa mga pangunahing isyu na dapat tutukan sa SONA ang malawakang pagbaha.
“Dapat ipakita sa SONA ni Pangulong Marcos ang pangako ng kanyang administrasyon na lutasin ang mga kagyat na isyung pambansa. Partikular na dapat niyang detalyado ang mga konkretong aksyon ng ehekutibo upang tugunan ang nakapipinsalang pagbaha, na binabalangkas ang takdang panahon at mekanismo ng pagpopondo para sa proyekto sa pagkontrol ng baha,” ayon kay Fr. Saballa.
Iginiit ng pari na kailangang ilatag ng Pangulo ang takdang panahon at mekanismo ng pagpopondo para sa mga proyekto sa flood control upang mabawasan ang pinsala sa mga komunidad.
Kaugnay naman sa pagmimina, hinahanap ng Caritas Novaliches ang isang patakarang nagbabalangkas ng balanse sa pagitan ng pangangalaga sa kalikasan at pagpapaunlad ng ekonomiya.
“Tungkol naman sa pagmimina, kailangan ng Pangulo na bumalangkas ng isang malinaw na patakaran na nagbibigay-priyoridad sa pangangalaga sa kapaligiran habang pinalalago ang ekonomiya.”pahayag ni Fr.Saballa sa Radyo Veritas
Sa larangan ng edukasyon, iginiit ni Fr. Saballa na mahalaga ang pagkakaroon ng detalyadong plano sa pagresolba sa kakulangan ng mga silid-aralan, kabilang ang pondo, iskedyul ng pagpapatupad, at pakikipagtulungan sa mga pribadong sektor.
Isa pang mahalagang usapin ang nalalapit na pagtatapos ng badyet para sa mga programa kontra HIV.
Dapat ipaliwanag ng Pangulo kung paano ito ipagpapatuloy at palalawakin, sa pamamagitan ng isang malinaw na plano.
Binigyan diin ng pari na ang SONA ay dapat magsilbing plataporma para sa malinaw at matatag na direksyon ng pamahalaan sa pagtugon sa mga isyung tunay na bumabagabag sa taumbayan.
