353 total views
Hinamon ni Apostolic Vicariate of Taytay Palawan Bishop Broderick Pabillo ang sambayanang Pilipino na manindigan at labanan ang mga kalakaran at polisiya na sumisira sa kabuhayan ng mga mahihirap.
Ito ang apela ng Obispo sa kanyang Liham Pastoral sa paggunita ng ika-limang WORLD DAY OF THE POOR ngayong November 14, 2021.
“Isa pang paraan ng pagtulong sa mahihirap ay ang paninindigan laban sa mga kalakaran na nagpapahirap at nagsasamantala sa kanila. Isa na rito ay ang pagsisira ng ating kapaligiran. Dito sa Palawan ang maraming mahihirap ay nabubuhay dahil sa kayamanan ng ating lupa, ng ating kabundukan at ng ating karagatan,” mensahe ng Obispo
Sinabi ni Bishop Pabillo na kaakibat din ang pagtulong at pagpapadama sa kapwa ng pagkalinga at pagmamalasakit.
“Magbahagi tao sa kanila, kahit na mahirap din tayo. Pinapaalaala sa atin ng ating programa ng Pondo ng Pinoy na kahit na maliit, kahit na bente singkong kusing na ibinibigay nang may pagmamahal, ay mahalaga at patungong langit. Makabibigay din tayo ng panahon sa pakikiisa sa pangangailangan ng iba sa pagbibigay ng aliw sa kanila. ,” mensahe rin ng obispo
Ipinagdarasal rin ni Bishop Pabillo na maging daan upang makapunta sa langit ang pakikipag-isa sa mga mahihirap.
Ayon sa Obispo, bukod sa pagababahagi ng tulong-pinansyal ay maari ring ipagdasal ang mga nasa laylayan ng lipunan na mapagtagumpayan ang hinaharap na mga hamon sa buhay.
Sa ika-15 ng Nobyembre 2021 ay pangungunahan ni Manila Archbishop Jose Cardinal Advincula ang banal na Misa sa Minor Basilica and Metropolitan Cathedral of the Immaculate Conception o Manila Cathedral bilang paggunita ng simbahan sa World Day of the Poor.
Ito ang ika-limang taong paggunita ng simbahang katolika sa Pilipinas ng World day of the poor na inilunsad ng kaniyang Kabanalang Francisco upang alalahanin ang mga nakakaranas ng labis na kahirapan sa buong daigdig.