1,001 total views
Inilarawan ni Mariologist priest Fr. Yulito Ignacio ng Pueblo Amante de Maria Mariological Marian Society of the Philippines (PAMMMSPhil) na marian in action ang namayapang si Msgr. Sabino Vengco.
Sa panayam ng Radio Veritas sinabi ni Fr. Ignacio na tapat at butihing pastol ng simbahan ang pari na naglilingkod sa Panginoon hanggang sa huling sandali ng kanyang buhay.
Sinabi nitong ito ay pagsasabuhay sa mga halimbawa ni Maria na buong pusong nagpuri at naglingkod sa Panginoon sa pamamagitan ng paglingap sa kapwa.
“Si Msgr. Vengco ay isang mariologist and marian in action, a pillar of theology and mariology; larawan siya ni Maria na gumagawa, naglilingkod, at nagmamahal sa kanyang anak na si Hesus,” pahayag ni Fr. Ignacio sa Radio Veritas.
Pumanaw si Msgr. Vengco nitong Mayo 17, 2021 ganap na alas dos ng hapon sa Cardinal Santos Medical Center dahil sa komplikasyon.
Hinikayat ni Fr. Ignacio ang mananampalataya na palalimin ang debosyon sa Mahal na Birhen na gagabay tungo sa kanyang anak na si Hesus tulad ng mga halimbawa ni Msgr. Vengco na buong tapang inihayag ang salita ng Diyos.
“Tularan natin si Msgr. Vengco na hindi natakot ipahayag si Kristo sa anumang dako siya pumaroon, sa radyo at telebisyon; buong sumunod kay Hesus sa pamamagitan ng Mahal na Birheng Maria,” ani Fr. Ignacio.
Matatandaang noong Marso ay isinugod sa pagamutan si Msgr. Vengco matapos mahawaan ng COVID-19 subalit gumaling at nakalabas nitong Mayo.
Mayo 11 nang muling isugod ang pari sa ospital dahil sa pananakit ng tiyan at sumailalim sa gallbladder surgery nitong Mayo 13.
Ibinahagi ni Fr. Ignacio na nauna nang tumanggap ng sakramento ng pagpapahid ng banal na langis si Msgr. Vengco sa pamamagitan ni Fr. Jun Abogado ng health ministry ng Archdiocese of Manila habang nabigyan din ito ng pagbabasbas ni Lingayen-Dagupan Archbishop Socrates Villegas bago pumanaw.
Inordinahang pari si Msgr. Vengco noong 1966 sa ilalim ng Diyosesis ng Malolos. Kilala ang pari sa kawanggawa kabilang na ang pagtatag sa ‘Kadiwa sa Pagkapari Foundation’ na tututok at mangangalaga sa mga matatanda at retiradong mga pari at obispo lalo na ang mga may karamdaman.
Itinatag ng pari ang Ephesus Ministry para lingapin ang mga retiradong diyosesanong pari sa buong bansa at suportahan ang kanilang pangangailangan. Sa mahigit limang dekadang paglilingkod ni Msgr. Vengco tumanggap ito ng iba’t ibang pagkilala dahil na rin sa masigasig nitong pagpapahayag ng salita ng Diyos.
Kabilang na rito ang “Dangal ng Lipi (Panglilingkod sa Pampamayanan) na iginawad ng pamahalaang panlalawigan ng Bulacan noong 2010. Kinilala rin ito San Jose Seminary o “San Jose Award” noong 2009 dahil sa pagpapaigting ng pagtuturo sa mga seminaryo katuwang sa paghubog ng mga magpapari at “Gawad Sagisag Quezon” mula sa Komisyon sa Wikang Pilipino dahil sa paggamit ng wikang Filipino sa Mass Media.
2007 nang tanggapin ng pari ang “Serviam” award ng Catholic Mass Media Awards dahil sa iba’t ibang programa sa radyo at telebisyon na pagbabahagi ng kristiyanismo sa bansa.
Kilalang manunulat din si Msgr. Vengco kung saan karamihan sa mga aklat ay tungkol sa debosyon sa Mahal na Birhen at huling sinulat nito ang ‘Shaping the Marian Piety’ bilang ambag sa pagdiriwang ng 500 Years of Christianity ng Pilipinas.
Nakatakdang ihatid sa huling hantungan ang pari sa Libingan ng mga Paring Taga-Hagonoy sa Mayo 22 pagkatapos ng requiem mass sa ala una ng hapon na pangungunahan ni Malolos Bishop Dennis Villarojo.
