264 total views
Nananatiling mahalagang sandigan ng lipunan ang pamilya sa gitna ng lumalalim na mga hamon at krisis sa iba’t ibang panig ng mundo.
Ito ang binigyang-diin ni Bishop Dario Gervasi, adjunct secretary ng Vatican’s Dicastery for Laity, Family and Life, sa kanyang homiliya sa pagdiriwang ng ika-45 anibersaryo ng Couples for Christ (CFC) na ginanap sa New Clark City Stadium sa Tarlac nitong June 20.
Batid ng obispo na malaki ang epekto ng mga krisis sa kasalukuyang panahon sa bawat pamilya.
“Today, we hear in different parts of the world that the family is in a state of crisis. And wherever there is this crisis, suffering also increases,” ayon sa pagninilay ni Bishop Gervasi.
Aniya, nanganganib ang kalagayan ng pamilya ay tumitindi rin ang takot, banta ng pagkakawatak-watak, at pag-iisa ng bawat miyembro nito.
“When the family is threatened, all members feel afraid of the future. And when the family is divided, the threat of loneliness increases more and more,” dagdag pa ng obispo.
Sa kabila nito, tiniyak ni Bishop Gervasi na may pag-asang mapagtagumpayan ng mga pamilya ang kanilang mga suliranin sa pamamagitan ng pananatili ng Diyos sa kanilang buhay.
“We can say that there is a secret to overcome all the challenges the family has to face. The secret is not to focus on our own strength,” ani Bishop Gervasi.
Paliwanag ng obispo na si Hesus ang tunay na pinagmumulan ng lakas at pagkakaisa ng bawat tahanan.
“When He is present in our family lives, He frees us from what makes us poor and weak,” aniya.
Hinimok din ni Bishop Gervasi ang mga miyembro ng Couples for Christ na manatiling tapat sa kanilang misyon bilang mga tagapagpalaganap ng Ebanghelyo sa kanilang mga pamilya at pamayanan.
Binigyang-diin din nito na ang bawat Kristiyanong nananatiling nakaugnay kay Kristo ay nagiging ilaw na nagbibigay ng pag-asa sa kapwa.
“A Christian who is connected to Jesus is a light that cannot be extinguished,” ayon kay Bishop Gervasi.
Kasabay ng paggunita sa ika-45 taon ng Couples for Christ, muling hinikayat ng opisyal ng Vatican ang mga miyembro ng CFC na buong tapang na ipahayag ang kanilang pananampalataya kay Hesus at manatiling tapat sa kanilang bokasyon bilang mga tagapagtaguyod ng pamilyang Kristiyano.
Binigyang-diin din ng obispo ang mensahe ni Pope Leo XIV na nagsasabing ang mga mananampalataya ay hindi kabilang sa “people of decline” kundi sa “generation of dawn” na tinatawag upang maghatid ng pag-asa at liwanag sa mundo.
Itinatag noong 1981, ang CFC ay isa sa pinakamalalaking Catholic lay movements sa Pilipinas na kasalukuyang naglilingkod sa 145 na bansa sa buong mundo sa pamamagitan ng ebanghelisasyon, pagpapalakas ng pamilya at paglilingkod sa mga mahihirap.
