1,101 total views
Ini-ulat ng Diocese of Imus – Social Action Center na 8,026 indibidwal mula sa 2,386 pamilya sa Cavite ang kasalukuyang na-displace at inilikas dahil sa pinagsamang epekto ng pinalakas na Habagat, Tropical Depression Luis at low-pressure area na dating Tropical Cyclone Maymay.
Batay sa ‘Byaheng Malasakitan Situational Report number two ng Caritas Imus, pasado ala-una ng hapon ngayong araw, umaabot narin sa 2,408 indibidwal o 648 pamilya ang nananatili sa mga evacuation center, habang 5,618 indibidwal o 1,738 pamilya naman ang nasa labas ng evacuation centers.
Inihayag ng Caritas Imus na malaki ang bilang ng apektado sa Tanza, Imus, Ternate, Kawit at iba pang mabababang lugar sa lalawigan.
Wala namang naitalang namatay, bagamat may mga nasirang bahay at kabuhayan, kabilang ang 5-nasirang bangka habang dalawa ang nawawala sa Ligtong, Rosario.
Marami din ang bahagyang nasirang mga bahay sa General Mariano Alvarez, Magallanes, Dasmariñas at Silang.
Ibinahagi ng Caritas Imus na naka-alerto sila at patuloy na mino-monitor ang mga lugar na binaha dahil sa walang tigil nap ag-uulan.
Inatasan na rin ng Caritas Imus ang lahat ng Parokya sa pamamagitan ng Parish Social Action Ministries na magsagawa ng monitoring, mangalap ng datos at makipag-ugnayan sa kanila para sa agarang pagtugon sa pangangailangan ng mga apektadong mamamayan sa lalawigan ng Cavite.
“Caritas Imus is on alert status and continuous monitoring of the Situation. All Parishes through their Parish Social Action Ministries are encourage to monitor the situation and coordinate to Caritas Imus for data gathering & possible interventions,” ang mensahe ng Caritas Imus sa Radyo Veritas
