28,333 total reads
Hinimok ng Dapat Isa Lang o D1L Movement ang publiko na makiisa sa isasagawang National Signing Day for People’s Initiative sa Hunyo 12 kasabay ng pagdiriwang ng Araw ng Kalayaan.
Ayon kay Dapat Isa Lang Movement Petitioner Atty. Alex Lacson, layunin ng nationwide campaign na makalikom ng mga lagda upang maisulong ang pagpasa ng isang tunay na Anti-Political Dynasty Law sa bansa sa pamamagitan ng People’s Initiative.
“Sa June 12 which is the National Independence Day sinet po natin yan as National Signing Day for People Initiative,” Bahagi ng paanyaya ni Lacson sa Radyo Veritas.
Paliwanag ni Lacson, magtatakda ang D1L Movement ng mga lugar sa iba’t ibang distrito sa bansa kung saan maaaring pumunta at lumagda ang mga mamamayan bilang suporta sa panukala na pagsusulong ng isang tunay na Anti-Political Dynasty Law sa Pilipinas.
“Para makapasa tayo ng genuine na Anti-Political Dynasty Law, nationwide campaign ang gagawin natin,” Dagdag pa ni Lacson.
Isinusulong ng Dapat Isa Lang o D1L Movement ang pagpapatibay ng isang tunay na batas laban sa political dynasty sa pamamagitan ng People’s Initiative.
Ayon sa kilusan, layunin nitong wakasan ang siklo ng korapsyon at kahirapan na dulot na rin ng dominasyon ng iilang pamilya sa politika.
Iminumungkahi ng panukala na limitahan sa isang posisyon lamang ang maaaring hawakan ng isang pamilya sa bawat antas ng pamahalaan, saklaw ang mga kamag-anak hanggang ika-apat na antas.
Sa ilalim ng People’s Initiative, kinakailangan ang lagda ng 10 porsyento ng rehistradong botante sa buong bansa at 3 porsyento sa bawat distrito upang maisulong ang panukala sa plebisito.
