550 total reads
Mahalaga ang pakikibahagi ng mga kabataan sa pamahalaan kaya’t mahalagang makiisa ang lahat sa nakatakdang SK at Barangay Elections.
Ito ang panawagan ni Senator Paolo Benigno “Bam” Aquino IV – chairman Senate Committee on Education, Arts, and Culture dalawang buwan bago ang nakatakdang halalang pambarangay.
Ayon sa Mambabatas mahalagang makisangkot ang bawat isa sa nakatakdang SK at Barangay elections lalo’t inaasahang unang beses ring ipatutupad ang SK Reform Law sa bansa.
“I think yung maganda ring development is lahat ng mga registered na mga 18 years old to 30 automatically nakarehistro na sila sa SK if they voted in the last election so ang mahalaga ngayon palagay ko is pag-isipan nating tumakbo and be part of the process…” pahayag ni Senator Aquino sa panayam sa Radio Veritas.
Nasasaad nga sa bagong SK Reform Law na maaaring bumoto sa SK ang mga may edad na 15 hanggang 30-taong gulang ngunit ang maaari lamang tumakbo para sa katungkulan ay ang mga may edad 18 hanggang 24-taong gulang.
Kaugnay nito, matapos ang dalawang linggong muling pagbubukas ng registration, tinataya ng Commission on Elections na 2-milyon ang mga nagparehistro para sa halalang pambarangay sa ika-31 ng Oktubre.
Samantala, nakatakda naman ang paghahain ng Certificate of Candidacy ng mga tatakbong Barangay at SK Officials mula ika-3 hanggang ika-5 ng Oktubre kung saan bahagi ng COC na lalagdaan partikular ng mga SK Candidates ang pagtiyak na wala silang kamag-anak sa mga halal na opisyal na maaaring maging batayan ng posibleng diskwalipikasyon sa kanilang posisyon.
Matatandaang sa naganap na Encounter with the Youth sa UST, ni Pope Francis noong ika-18 ng Enero taong 2015 ay hinamon nito ang mga kabataan na mag-isip, makiramdam at kumilos upang tunay na makapagbahagi sa kapwa, partikular na sa mga nangangailangan at maging sa kapakanan ng buong bayan.
