23,953 total reads
Itatampok ang panawagan sa mga kabataan na pagnilayan ang bokasyon sa pagpapari at buhay-relihiyoso sa pamamagitan ng Vocation Jamboree at Holy Hour for Vocations bilang bahagi ng pagbubukas ng ika-4 na Tour ng Pilgrim Image ni St. Tarcisius of Rome sa August 21 sa Good Shepherd Cathedral ng Diocese of Novaliches sa Quezon City.
Sa Vocation Jamboree mula alas-1:30 hanggang alas-2:20 ng hapon, magkakaroon ng mga booth ang mga vocation director mula sa Diocese of Novaliches at iba’t ibang religious communities upang ipakilala ang mga bokasyon sa Simbahan, magbahagi ng impormasyon at hikayatin ang mga kalahok na bukas na pagnilayan ang posibilidad ng pagtugon sa tawag ng Panginoon.
Susundan ito ng Holy Hour for Vocations mula alas-2:20 hanggang alas-3:10 ng hapon, kung saan ilalaan ang panahon para sa tahimik na pananalangin, pagninilay, pagbabasa ng Banal na Kasulatan at paghingi sa Panginoon ng dagdag na mga bokasyon sa pagpapari at buhay-relihiyoso.
Pangungunahan ni Fr. Joshua Paul Sadernas, Vocation Director ng diyosesis, ang Holy Hour na magsisilbing espirituwal na paghahanda bago ang pormal na pagsisimula ng pilgrimage.
Magkakaroon din ng liturgical formation para sa mga altar server ng diyosesis, habang pangungunahan ni Dr. Dave dela Cruz, O.P., ang talakayan tungkol sa buhay ni St. Tarcisius at sa mga banal na relikya.
Si St. Tarcisius ay kinikilalang patron ng mga altar server at naging huwaran ng katapatan sa Eukaristiya at matapang na paglilingkod sa kabila ng panganib.
Ganap namang idedeklara ang pagsisimula ng ika-4 na Tour sa Rite of Enthronement and Prayer to St. Tarcisius of Rome dakong alas-3:30 ng hapon, na pangungunahan ni Fr. Leoncito Falcasantos, Jr., Priest-in-Charge ng Diocesan Ministry of Altar Servers.
Susundan ito ng solemn procession sa paligid ng Novaliches Cathedral bago ang Solemn Welcome Mass, sa alas-6 ng gabi, na pangungunahan ni Novaliches Bishop Roberto Gaa, kasama ang mga pari mula sa iba’t ibang parokya at mga religious congregation.
Inaasahang bibisitahin ng pilgrim relic ni St. Tarcisius ang 74 na parokya ngayong taon, bilang bahagi ng pagpapalalim ng debosyon sa banal na Eukaristiya at paghikayat sa mga kabataan na tuklasin ang kanilang bokasyon sa Simbahan.
