4,339 total reads
Pormal nang isinapubliko ng Catholic Bishops’ Conference of the Philippines Episcopal Commission on Evangelization and Catechesis ang poster para sa pagdiriwang ng National Catechetical Month 2026.
Inaanyayahan ng komisyon ang mga mananampalataya na sama-samang paghandaan ang mga gawain sa catechetical month sa Setyembre, lalo na ang pagbabahagi ng katesismo, ay tungkulin ng bawat binyagan.
“May National Catechetical Month 2026 remind us that every catechist is called not only to teach the faith, but also to witness to it through a life of prayer, service, communion, and mission,” ayon sa pahayag ng komisyon sa kanilang official Facebook page.
Tema sa pagdiriwang ngayong taon ang “Dumngeg: Synodal Journey for One Mission” bilang pagpapaigting sa pagpapatupad ng mga programa ng Simbahang Sinodal.
Tuwing Setyembre, ipinagdiriwang ng simbahan sa Pilipinas ang National Catechetical Month bilang pagbibigay-pugay kay San Lorenzo Ruiz, ang kauna-unahang martir na santong Pilipino at aktibong katekista habang siya ay nabubuhay pa.
Sa pag-aaral ng National Catechetical Studies ng University of Santo Tomas, nasa 50,000 ang bilang ng mga katekista sa buong bansa na nagtuturo sa mga eskwelahan, parokya, at mga komunidad.
