15,479 total reads
Mariing nanindigan ang Parents Advocacy for Children’s Education (PACE) sa Senate Bill 1979 or the Adolescent Pregnancy Prevention Bill.
Ayon kay PACE Founding Chairman, Professor Rey Vargas, PhD, nakababahala ang panukala na maaring maisantabi ang karapatan ng magulang sa pagtalakay ng mga sensitibong usapin sa mga anak.
Nangangamba rin si Vargas sa mandatory Comprehensive Sexual Education (CSE) sa mga paaralan na nakabatay sa international standards.
“I will not be in favor because it encroaches parental rights, to the point of taking away their consent. The Bill also demands mandatory CSE which is designed from international standards. In total, magiging accessible na ang reproductive facilities, even abortion, without even parental consent,” pahayag ni Vargas sa Radio Veritas.
Batay sa orihinal na bersyon ng panukala dapat compulsory ang pagpapatupad ng CSE sa pribado at pampublikong paaralan at hindi dapat umasa sa pagpapasya ng mga guro o schools administration ang pagpapatupad sa halip ay isama sa curriculum ng eskwelahan ayon sa panuntunan ng Department of Education at international standards.
Upang matiyak ang pagpapatupad ng CSE sa mga paaralan iminungkahi sa panukala gawin itong requirements sa Philippine Accreditation System for Basic Education o PASBE ng DepEd.
Tinalakay din sa panukala ang mga panuntunan at programang ipatutupad para sa mga guro at magulang sa paggabay sa kanilang mga anak sa usapin ng sekswalidad.
Una nang tinutulan ng Sangguniang Laiko ng Pilipinas ang panukala at tinawag na ‘diabolical’.
Samantala inirerekomenda ni Senate Committee on Basic Education Chairperson Sherwin Gatchalian na isantabi ng DepEd ang CSE sa halip ay ipatupad na lamang ang Reproductive Health Education na isinaad sa RH Law na pinagbatayan ng SB 1979.
Una nang binawi nina Senators JV Ejercito, Nancy Binay, Bong Go, Cynthia Villar, Bong Revilla Jr., Loren Legarda, at Senate President Pro Tempore Jinggoy Estrada ang kanilang suporta sa panukala.
