10,589 total reads
Nanawagan si Pope Leo XIV ng agarang pagpapalaya sa lahat ng bihag kasunod ng ulat ng malagim na masaker sa Kenscoff, Haiti.
Sa kanyang mensahe matapos ang Angelus sa Piazza della Libertà sa Castel Gandolfo, inihayag ng Santo Papa ang kanyang pakikiisa sa mga biktima at kanilang mga pamilya matapos ang insidenteng kumitil sa maraming buhay at nag-iwan ng ilan bilang bihag.
“I express my spiritual closeness to the victims and their families, and call for the immediate release of all hostages,” ayon sa pahayag ni Pope Leo XIV.
Umapela rin ang punong pastol ng Simbahang Katolika sa mga namumuno na kumilos upang wakasan ang karahasan at tiyakin ang kaligtasan ng mamamayan.
“I make a heartfelt appeal to all those in positions of authority to take concrete steps in order to ensure the safety of the population and put an end to all forms of violence,” ani ng Santo Papa.
Muling iginiit ni Pope Leo XIV ang panawagan para sa kapayapaan sa mundo, sa paggunita sa aral ni San Agustin ukol sa kapayapaan bilang tinapay na pinaghahati-hati at ibinabahagi.
“May there be an increase in the world of those who courageously break and share the bread of peace, overcoming divisions, promoting justice and practicing forgiveness for the good of all,” ayon sa Santo Papa.
Nagpaabot din ng panalangin ang Santo Papa para sa mga apektado ng matinding pagbaha sa Nepal at Tibet, kabilang ang mga nasawi, nasugatan, nawawala, kanilang mga pamilya, at mga rescue worker.
Kasabay nito, hinikayat niya ang mga mananampalataya na itaguyod ang pangangalaga sa kalikasan sa pagsisimula ng Season of Creation, na may temang “Living Water.”
“Caring for our common home calls for a conversion of heart, so that what has been used to bring about destruction may instead be directed toward life,” giit ni Pope Leo.
Sa September 1, sa pagsisimula ng Season of Creation ay pangungunahan ng Santo Papa ang pagbubukas sa pamamagitan ng banal na misa sa Laudato Si’ Garden sa Castel Gandolfo.
