2,646 total views
Naglabas ng liham sirkular si Lucena Bishop Mel Rey Uy, na nag-aatas ng pagsasagawa ng ikalawang koleksyon sa lahat ng anticipated at Sunday Masses sa darating na Hunyo 13 at 14, 2026 bilang tugon sa pangangailangan ng mga naapektuhan ng malakas na lindol sa General Santos at mga karatig na lugar sa rehiyon ng Mindanao.
Nasasaad sa direktiba ni Bishop Uy sa ilalim ng Circular No. 05, Series of 2026, na ang malilikom na pondo ay ilalaan para sa mga relief at rehabilitation efforts upang matulungan ang mga pamilyang naapektuhan ng 7.8-magnitude na lindol sa Mindanao.
Hinikayat din ng Obispo ang mga mananampalataya na ipakita ang diwa ng pagkakaisa at malasakit bilang iisang pamilya ni Kristo sa pamamagitan ng mapagkawanggawang pagtugon sa pangangailangan ng mga nasalanta.
“As one family in Christ, let us extend our generosity and solidarity to those who are suffering and in need. The proceeds of this collection will support relief and rehabilitation efforts for the affected communities. “Bear one another’s burdens, and so fulfill the law of Christ.” (Galatians 6:2) May our compassionate response be a sign of God’s love and mercy to our brothers and sisters in General Santos.” Bahagi ng liham sirkular ni Bishop Uy.
Ayon kay Bishop Uy, higit na mahalaga sa kasalukuyang panahon ang pagkakaisa ng lahat sa pagtulong at pagdadamayan para sa kalagayan ng mga mamamayang naapektuhan ng malakas ng pagyanig.
Umaasa naman ang Diyosesis ng Lucena na sa pamamagitan ng sama-samang pagkilos ng mga mananampalataya ay maipadama ang pagmamahal at awa ng Diyos sa lahat ng mga lubhang naapektuhan ng trahedya sa Mindanao.
Sa tala may mahigit sa 40 ang mga parokya sa Diyosesis ng Lucena na nagsisilbing gabay sa buhay espiritwal ng may humigit kumulang 1-milyong mga Katoliko sa lugar.
