21,742 total reads
Ibinahagi ni Cebu Archbishop-designate Alberto Uy ang kahalagahan ng pagtatatag ng tree park bilang konkretong tugon sa pangangalaga ng kalikasan at pamana para sa mga susunod na henerasyon.
Ayon kay Archbishop Uy, ang pagkakaroon ng tree park ay may malaking ambag sa kapaligiran dahil nakatutulong ito sa pagpigil ng pagbaha, pagpapabuti ng kalidad ng hangin, at pagbibigay ng tahanan sa iba’t ibang uri ng hayop.
Kaugnay rin ito ng patuloy na pagsusulong ng arsobispo sa pagtatanim ng mga puno, at ng pagdiriwang ng Season of Creation ngayong taon.
“They will serve as natural defenses against the worsening effects of climate change,” pahayag ni Archbishop Uy.
Binanggit ni Arcbishop Uy ang benepisyo ng mga luntiang espasyo sa kalusugan at kapakanan ng tao, dahil nagbibigay ang mga ito ng pagkakataon para sa pamamahinga, paglilibang, at pagpapagaling.
Dagdag pa rito, maaari ring magsilbing living classroom ang tree park para sa mga bata at kabataan upang matuto tungkol sa pangangalaga sa kalikasan.
Sinabi pa ni Archbishop Uy na nakikita rin ang potensyal ng ganitong uri ng espasyo na makatulong sa turismo at kabuhayan, habang pinagtitibay ang pagkakaisa ng simbahan, pamahalaan, paaralan, at iba pang organisasyon sa iisang layuning magtanim, mag-alaga, at mag-iwan ng mas luntiang pamana para sa mga susunod na salinlahi.
Aniya, ang proyektong ito ay hindi lamang simpleng inisyatiba sa kapaligiran kundi isang moral na tungkulin at pamana ng pag-ibig sa nag-iisang tahanan at sa kapwa.
“Every tree planted is a prayer for the future. Every park nurtured is a sign of our faith in life,” ayon kay Archbishop Uy.
Una nang kinilala ni Archbishop Uy ang Sikatunarra Tree Park Project ng lokal na pamahalaan ng Sikatuna, Bohol, na hango sa pangalan ng bayan at ng Narra—ang pambansang puno ng Pilipinas.
Layunin ng proyekto na magtanim ng daan-daang libong puno ng Narra sa mga bakanteng lupain ng bayan upang gawing malawak na tree park na magsisilbing sagisag ng pagkakaisa ng pamayanan at pagpapahalaga sa kalikasang bahagi ng kulturang Pilipino.
