2,589 total reads
Kinondena ni Pangulong Ferdinand Marcos Jr. ang panibagong insidente ng pamamaril sa loob ng paaralan sa Banga National High School sa South Cotabato kung saan tatlo ang naiulat na nasawi.
Ito na ang ikatlong insidente ng pamamaril sa loob ng eskwelahan sa loob ng tatlong buwan kasunod ng naganap na pamamaril sa Tacloban at Zamboanga.
Ayon sa Pangulo, hindi dapat maging bahagi ng buhay ng mga batang Pilipino ang pamamaril at karahasan sa loob ng mga paaralan.
Binigyang-diin ng Pangulo na karapatan ng mga estudyante na makapag-aral nang walang takot at ng mga magulang na makatiyak na ligtas ang kanilang mga anak sa paaralan.
“Hindi natin maaaring tanggapin na maging bahagi na lamang ng buhay ng ating mga anak ang mga pamamaril sa paaralan. Karapatan ng ating mga anak na makapag-aral nang walang takot. Karapatan ng mga magulang na maipadala sila sa paaralan nang alam na uuwi silang ligtas. Ito ang pananagutan natin sa bawat pamilyang Pilipino,”diin ng Pangulo.
Iniutos ni Marcos ang masusing imbestigasyon sa insidente, kabilang ang kung paano nakakuha ng baril ang isang menor de edad at kung paano ito naipasok sa loob ng paaralan.
Tiniyak din ng Pangulo ang tulong at kinakailangang gamutan para sa mga nasugatan, habang nagpaabot ng pakikiramay sa mga pamilyang nawalan ng mahal sa buhay.
Inatasan din ng punong ehekutibo ang Department of Education, Department of the Interior and Local Government at Philippine National Police na mag-ulat sa mga hakbang na ipinatupad para mapalakas ang seguridad sa mga paaralan.
Sinabi rin ng Pangulo na maglalabas ng karagdagang hakbang ang pamahalaan sa mga susunod na araw upang matugunan ang mga kakulangan sa seguridad at higit na maprotektahan ang mga estudyante.
