47,676 total reads
Itatampok ng Catholic prayer app na Hallow ang isang bagong paraan ng pagninilay sa buhay at debosyon kay San Padre Pio ilang araw bago ang kapistahan ng santo sa September 23.
Inilunsad nito ang “Paghilom,” isang siyam na araw na nobena na pinangungunahan ng mag-asawang broadcaster na sina Julius at Tintin Babao na matagal nang deboto ni Padre Pio.
Inaanyayahan nito ang mga mananampalataya na idulog sa panalangin ang kanilang mga pisikal, emosyonal at espirituwal na sugat.
Hindi lamang nakatuon ang nobena sa mga himalang iniuugnay kay Padre Pio, kundi sa mismong mga karanasan ng santo sa karamdaman, paghihintay, pagdurusa at pakikiramay sa mga nagdurusa.
Ayon kay Bernz Ordoñez Caasi, Philippines Team Lead ng Hallow, nais nilang ipakita si Padre Pio hindi lamang bilang isang kilalang miracle-working saint kundi bilang isang taong nakaranas din ng sarili niyang paghihirap at buong-pusong inialay sa Diyos ang bawat isa.
“We wanted to approach Padre Pio not simply as the famous miracle-working saint people see on prayer cards and statues, but as a person who knew what it was like to be sick, to wait, to suffer, and to accompany other people in their pain,” ayon kay Caasi.
Sa siyam na araw na paglalakbay, inaanyayahan ang mga kalahok na magdala ng isang partikular na intensyon para sa pagpapagaling—maaaring karamdaman, sugat mula sa nakaraan, problema sa relasyon, o anumang bahagi ng buhay na nangangailangan ng paggaling.
Iginiit ni Caasi na bagama’t hinihikayat ng nobena ang mga deboto na hilingin ang kagalingan ay hindi ito nangangahulugang dumating ang sagot sa paraang inaasahan ng tao, kundi buong-loob na ipagkatiwala sa Diyos ang bawat kahilingan.
“The novena still asks boldly for healing, but its deeper invitation is to remain with Jesus even when the answer does not come in the way or at the time we expect,” aniya.
Bahagi ng bawat pagninilay ang mga yugto sa buhay ni Padre Pio, mula sa kanyang kabataan sa Pietrelcina at mga karamdaman, hanggang sa pagtanggap niya ng stigmata, paglilingkod sa mga maysakit at mga naghihirap, at sa kanyang huling pagdiriwang ng Banal na Misa.
Tampok din sa paghilom nobena ang Banal na Kasulatan, guided reflection at imaginative prayer upang mas mailapit ang mga deboto sa karanasan ng santo.
Sentro ng buong nobena ang panalanging iniuugnay kay Padre Pio: “Manatili Ka sa aking piling, Panginoon.”
Samantala, personal din para sa mag-asawang Julius at Tintin Babao ang kanilang debosyon kay Padre Pio.
Nagsimula ito mahigit dalawang dekada na ang nakalilipas matapos silang hikayatin ng kanilang yumaong kaibigang si Ricky Lo na bumisita sa Padre Pio Center sa Quezon City.
Kalaunan, nang manalangin ang mag-asawa para sa isa pang anak, nangako silang kung pagkakalooban ng anak na lalaki ay pangangalanan itong Antonio Francesco, bilang parangal kina San Antonio de Padua, San Francisco de Assisi at Padre Pio, na ang baptismal name ay Francesco.
Ipinanganak ang kanilang anak na si Antonio Francesco o Nion a naging daan sa kanilang tradisyon na mamahagi ng mga larawan nina Padre Pio at San Antonio sa mga simbahan at kapilya tuwing kaarawan ng kanilang mga anak.
Gayunman, nilinaw ng Hallow na hindi ipinangangako ng Paghilom na agad makakamit ang kagalingan sa isang partikular na karamdaman, sugat o sitwasyon matapos ang siyam na araw.
Hinihikayat din ang mga nakararanas ng mabibigat na sugat na humingi ng tulong sa mga taong mapagkakatiwalaan o kwalipikadong propesyonal, habang itinatampok ang pagtatatag ni Padre Pio ng Casa Sollievo della Sofferenza, o Home for the Relief of Suffering, bilang halimbawa ng pagsasama ng panalangin at pangangalagang medikal.
Binibigyang-diin ng nobena na ang debosyon kay Padre Pio ay hindi nagtatapos sa santo kundi humahantong kay Kristo, partikular sa Kanyang presensya sa Banal na Eukaristiya.
“We don’t want to take away that boldness in asking. But ultimately, Padre Pio’s role is to lead us somewhere beyond himself. The destination of this novena is Jesus,” giit ni Caasi.
Mapapakinggan ang “Paghilom” sa Hallow app bilang paghahanda sa kapistahan ni San Padre Pio sa September 23 at maaari rin itong dasalin anumang panahon ng taon.
