248 total views
Labis na ikinabahala ng Franciscan Province of San Pedro Bautista o OFM Franciscans Philippines ang mga nagaganap na aktibidad kaugnay ng panukalang Ahunan Pumped Storage Hydropower Project (APSHP) sa Pakil, Laguna.
Kasunod ito ng inilabas na Cease-and-Desist Order ng National Historical Commission of the Philippines (NHCP) dahil sa posibleng epekto nito sa San Pedro de Alcantara Parish Church at ang makasaysayang Turumba Spring.
Ayon kay Fr. Lino Gregorio Redoblado, OFM, Minister Provincial ng Franciscans Philippines ang nasabing mga pamanang pook ay hindi lamang mahalagang istruktura kundi may malalim na kasaysayan, kultura, pananampalataya at espiritwal na kahalagahan para sa mamamayan ng Pakil at ng bansa.
“As Franciscans, we believe that authentic development must always uphold the dignity of persons, protect the integrity of creation, and respect the cultural and spiritual heritage of communities,” pahayag ni Fr. Redoblado.
Iginiit ng pari na ang tunay na kaunlaran ay dapat laging nagtataguyod sa dignidad ng tao, nangangalaga sa integridad ng kalikasan, at iginagalang ang pamana ng kultura at pananampalataya, at hindi dapat isinasantabi ang mga ito kapalit ng pag-unlad ng ekonomiya.
Binanggit din ng mga Franciscano ang naging hakbang ng NHCP, na nagsabing nagpatuloy ang ilang konstruksiyon at kaugnay na aktibidad kahit may nauna nang kahilingan para sa pagsusumite ng mga plano at Heritage Impact Assessment.
Dahil dito, ipinag-utos ng komisyon ang agarang pagsuspinde ng proyekto habang hinihintay ang pagsunod sa mga kinakailangang legal at heritage conservation requirements.
“The Franciscan tradition teaches us to contemplate creation not as a resource to be exploited but as a gift entrusted to our stewardship. Likewise, our historical and cultural heritage is not merely a remnant of the past but a sacred inheritance that connects generations and strengthens communal identity,” ayon kay Fr. Redoblado.
Hinikayat ni Fr. Redoblado ang lahat ng kinauukulan na sumunod sa batas, pairalin ang transparency at pananagutan, at magsagawa ng tunay at malawakang konsultasyon sa mga komunidad at sektor na maaapektuhan ng proyekto, kabilang dito ang mga lider ng Simbahan, environmental advocates, cultural workers, at iba pang stakeholder.
Hinikayat din ng pari na isantabi ang pansariling interes at unahin ang ikabubuti ng lahat, na nakabatay sa pangmatagalang pangangalaga sa kalikasan, pagpapanatili ng pamanang kultura, at pagsusulong ng katarungang panlipunan.
Ipinahayag din ng mga Franciscano ang pakikiisa sa Diocese of San Pablo, sa mamamayan ng Pakil, at sa mga deboto ng Nuestra Señora de los Dolores de Turumba, gayundin sa pangangalaga ng San Pedro de Alcantara Church at ng likas na kapaligiran ng pamayanan.
Sa paggunita ng ika-800 anibersaryo ng Transitus o Kamatayan ni San Francisco ng Assisi, sinabi ng mga Ordeng Franciscano sa Pilipinas na ang hamon ay hindi lamang tungkol sa isang proyekto, kundi sa uri ng kinabukasan na nais ipamana sa susunod na henerasyon.
“We therefore urge all stakeholders to pursue a path marked by dialogue, transparency, responsibility, and respect for both creation and heritage. In doing so, we honor not only our legal obligations but also our moral duty to care for God’s gifts and protect the memory and identity of our people,” saad ni Fr. Redoblado.
