18,129 total reads
Hinimok ni Cebu Archbishop Alberto Uy ang mga Pilipino na gawing inspirasyon si San Mateo sa pagbabago ng buhay at pagtigil sa anumang uri ng katiwalian.
Sa kanyang pagninilay sa kapistahan ni San Mateo, binigyang-diin ng arsobispo ang kuwento ng dating maniningil ng buwis na iniwan ang kanyang dating buhay matapos siyang tawagin ni Hesukristo na sumunod sa Kanya.
“That is perhaps the most beautiful part of Matthew’s story. He got up. He left behind an old way of life and began again. And this makes me wonder: What if all our corrupt officials in the Philippines would “do a Matthew”? What if those who have stolen public money would one day hear Jesus saying, “Follow me”—and actually get up? What if they admitted what they had done? What if they returned what did not belong to them? What if they stopped using public office for personal enrichment and began using it for genuine public service?,” ayon kay Archbishop Uy.
Ayon kay Archbishop Uy, mahalaga ang pagbabagong ito lalo na sa harap ng problema ng katiwalian at maling paggamit ng pera ng bayan.
Sinabi ng arsobispo, ang tunay na pagsisisi ay hindi lamang pag-amin sa nagawang mali kundi dapat makita sa pagbabago ng buhay, pagtanggap ng pananagutan at, kung maaari, pagsasauli ng hindi naman pag-aari.
Ayon pa kay Archbishop Uy, “No sinner is beyond conversion. No corrupt person is beyond repentance. But genuine repentance cannot remain in words. It must bear fruit—in truth, restitution where possible, accountability, and a changed life.”
Kapag nangyari ito ayon sa arsobispo, mas maraming pondong inilaan para sa mga paaralan, ospital, magsasaka, manggagawa, pabahay at imprastraktura ang tunay na makararating sa mga nangangailangan.
Ngunit ayon sa arsobispo, hindi lamang mga opisyal ng pamahalaan ang kailangang magbago.
Nagsisimula rin ang katiwalian sa puso kapag inuuna ng tao ang sariling pakinabang, iniisip na walang makaaalam o ipinapalagay na normal lamang ang maling gawain.
Kaya mahalaga ayon kay Archbishop Uy ang pagbabago ng puso, kasabay ng mga batas, imbestigasyon at pananagutan.
Sa mensahe ng Ebanghelyo, binibigyan ni Hesus ng pagkakataon ang mga makasalanan na magbago at magsimulang muli.
Hinikayat ni Archbishop Uy ang mga Pilipino na maging tulad ni San Mateo—may tapang na iwan ang maling gawain at piliin ang katapatan, paglilingkod at kabutihang panlahat.
