11,585 total reads
Ipinagkaloob ng Apostolic Penitentiary ang isang partikular na plenary indulgence sa pagdiriwang ng ika-150 anibersaryo ng pagkakatatag ng Reparatrix Sisters of the Sacred Heart.
Ito ang inanunsyo ng Diocese of Catarman sa pamamagitan ng dekreto ni Catarman Bishop Nolly Buco na naglalayong higit pang mapalalim ang debosyon ng mga mananampalataya sa Sacred Heart of Jesus at Immaculate Heart of Mary.
Ayon sa diyosesis, maaaring magkamit ng plenary indulgence ang mga mananampalatayang bibisita sa Community Chapel ng Reparatrix Sisters of the Sacred Heart sa St. Joseph Academy sa San Jose, Northern Samar at tutugon sa mga karaniwang kondisyon ng Simbahan tulad ng sakramental na kumpisal, banal na komunyon, pananalangin para sa intensyon ng Santo Papa, at pagkakaroon ng tunay na pagsisisi at diwa ng pagkakawanggawa.
Batay sa Decretum ng Apostolic Penitentiary, maaaring matamo ang biyayang espiritwal mula October 23, 2025 hanggang October 23, 2026 at maaari rin itong ialay para sa mga kaluluwa sa purgatoryo.
Hinimok din ng Diocese of Catarman ang mga mananampalataya na makibahagi sa banal na misa tuwing unang Sabado ng buwan mula Hunyo hanggang Oktubre 2026 bilang bahagi ng pagdiriwang ng hubileyo ng kongregasyon.
Kabilang sa mga itinakdang petsa ng misa ang June 6, July 4, August 1, September 5, at October 3, 2026.
Dalangin ng diyosesis na sa pamamagitan ng biyayang ito ay higit pang lumalim sa mga mananampalataya ang diwa ng pagsisisi, pagbabalik-loob, at makapamilyang pagmamahal sa mga puso nina Hesus at Maria.
