13,445 total reads
Magsasagawa si Pope Leo XIV ng 11-araw na Apostolic Journey sa Uruguay, Argentina, at Peru mula Nobyembre 6 hanggang 17, ayon sa inanunsyo ng Holy See Press Office.
Batay sa inilabas na schedule, bibisitahin ng Santo Papa ang Montevideo, Paysandú, at Florida sa Uruguay mula Nobyembre 6 hanggang 8. Susunod naman ang paglalakbay sa Buenos Aires, Córdoba, at Luján sa Argentina mula Nobyembre 8 hanggang 11, bago magtungo sa Lima, Chiclayo, Cusco, at Pucallpa sa Peru hanggang Nobyembre 17.
Itinuturing na makasaysayan ang pagbisitang ito, lalo na sa Uruguay na may pinakamababang porsiyento ng mga Katoliko sa buong Latin America, kung saan tinatayang nasa 36 porsiyento lamang ng populasyon ang kabilang sa Simbahang Katolika.
Magiging makahulugan rin ang pagdalaw ng Santo Papa sa Argentina, na siyang sinilangang-bayan ng yumaong Pope Francis. Sa kabila ng kanyang 12 taong panunungkulan bilang pinuno ng Simbahang Katolika, hindi nakabalik si Pope Francis sa kanyang sariling bansa bilang Santo Papa.
May natatanigi ring kaugnayan si Pope Leo XIV sa Peru, kung saan nagsimula ang kanyang gawaing misyonero noong dekada ’80. Dito rin siya nagsilbing obispo at kalaunan ay naging mamamayan ng naturang bansa.
Sa kabuuan, bibisita ang Santo Papa sa 10 lungsod sa loob ng 11 araw, bilang bahagi ng kanyang misyon na palakasin ang pananampalataya, hikayatin ang pagkakaisa ng Simbahan, at makipagtagpo sa mga mananampalataya sa iba’t ibang bahagi ng Latin America.
Ito ang magiging ikaanim na international apostolic journey ni Pope Leo XIV mula nang mahalal bilang Santo Papa.
