10,414 total reads
Hinikayat ni Lipa Archbishop Gilbert Garcera ang mga mananampalataya na makiisa sa pananalangin para sa agarang paggaling ng Kanyang Kabanalan Francisco.
Sa inilabas na liham-sirkular, nanawagan si Archbishop Garcera sa mga pari, relihiyoso, at mga layko na mag-alay ng Banal na Misa, panalangin ng Santo Rosaryo, at mga personal na panalangin upang makamit ng Santo Papa ang mapagpagaling na presensya ng Panginoon Hesukristo.
“As we celebrate the Jubilee of Hope, may Pope Francis be restored to full health that he may continue his mission of spreading the Gospel and fostering unity among God’s people through the intercession of Our Lady of Caysasay, our Queen and Mother, and St. Joseph, patron saint of our Archdiocese,” ayon kay Archbishop Garcera.
Kalakip naman ng liham ang Panalangin para kay Papa Francisco na uusalin sa lahat ng mga Misa pagkatapos ng post-communion prayer.
PANALANGIN PARA KAY PAPA FRANCISCO
Mapagmahal na Diyos,
Hinihiling namin na pagpalain mo ang iyong lingkod na si Papa Francisco, na naglingkod sa iyo bilang isang Heswita, isang pari, isang arsobispo, isang kardinal, at ngayon bilang isang papa.
Higit sa lahat, naglingkod siya sa iyo bilang isang tapat na Kristiyano, ibinabahagi ang pag-ibig, awa, at habag na ipinakita ng iyong Anak sa lahat ng kanyang nakatagpo, lalo na sa mga mahihirap at nahihirapan.
Habang hinaharap ni Papa Francisco ang panibagong sakit na ito, pagpalain mo ang mga doktor at nars na nag-aalaga sa kanya, bigyan mo siya ng lakas upang matiis ang anumang sakit nang may biyaya, at pagalingin mo siya nang mabilis.
Hinihiling namin ito sa iyong Banal na Pangalan. Amen.
Kaugnay nito, pinangunahan ni Archbishop Garcera ang sama-samang pananalangin at pag-aalay ng Banal na Misa para sa kagalingan ni Pope Francis sa Minor Basilica & Parish of the Immaculate Conception and Archdiocesan Shrine of Sto. Niño ng Batangan, Batangas City.
Samantala, kasunod ng panawagan ni Papal Nuncio to the Philippines Archbishop Charles Brown at ng Catholic Bishops’ Conference of the Philippines (CBCP), hinimok din ni Imus Bishop Reynaldo Evangelista ang bawat isa na magsagawa ng mga pagtitipon, tulad ng Banal na Oras, para sa ganap na kagalingan ni Pope Francis.
“I kindly request all parishes, religious, and Christian communities to organize prayer periods, like gathering the faithful for Holy Hours for the healing of the sick most especially, Pope Francis. May the Lord, who is the source of healing, constantly renew us for mission,” ayon kay Bishop Evangelista.
Sa kasalukuyan, nananatili pa rin ang 88-taong gulang na Santo Papa sa Agostino Gemelli University Polyclinic sa Roma upang sumailalim sa karagdagang gamutan matapos makitaan ng bilateral o double pneumonia sa baga.
