25,106 total reads
Hinimok ni Apostolic Nuncio to the Philippines Archbishop Charles Brown ang mga pari at mga mananampalataya na panatilihing nakaugat sa Kristiyanong pananampalataya ang Santacruzan at iba pang popular na debosyon upang hindi mawala ang kanilang tunay na diwa at kahulugan.
Sa paggunita sa Feast of the Exaltation of the Holy Cross tuwing Setyembre 14, ipinaliwanag ni Archbishop Brown na may kaugnayan ang Santacruzan sa tradisyon ng paghahanap ni Santa Helena, ina ni Emperor Constantine, sa Banal na Krus noong ika-4 na siglo.
Sa Pastoral Visit on the Air sa Radyo Veritas ni Archbishop Brown, inihayag ng Arsobispo na pinagsasama sa Santacruzan ang debosyon sa Mahal na Birheng Maria at sa Banal na Krus, kaya mahalagang manatiling malapit ito sa Simbahan.
“I’m entirely in favor of these popular devotions. But it’s important to kind of keep them close to the Church,” Bahagi ng pahayag ni Archbishop Brown sa Radyo Veritas.
Binigyang-diin din ng Arsobispo na ang mga popular na debosyon ay representasyon ng pananampalataya ng mga mananamapalataya ngunit dapat tiyaking hindi ito tuluyang magiging sekular.
“Let’s try as priests, try to baptize it, you know, and keep it close somehow,” Ani Archbishop Brown.
Iminungkahi rin ng Arsobispo na maaaring magkaroon ng Misa para sa Santacruzan o pagbabasbas para sa Reyna Elena upang mapanatili ang ugnayan nito sa pananampalataya.
Aniya, nagbibigay rin ito ng pagkakataon sa mga pari na ipaliwanag ang kahulugan ng Krus, si Santa Helena, at ang Kristiyanong pinagmulan ng tradisyon.
“You know, Santacruzan of course goes back to Saint Helen and the finding of the Cross and all of that. But we have to be careful that they don’t become totally de-Christianized, these feasts. And the best example we have of that, of course, is Halloween, which now has zero or less than zero Christian significance.” Ayon pa kay Archbishop Brown.
Nagbabala naman ang Apostolic Nuncio na kapag tuluyan nang nawala ang Kristiyanong kahulugan ng isang debosyon ay maaaring maging mahirap na itong muling maibalik.
Binigyang halimbawa niya ang Halloween, na aniya ay nagsimula bilang isang Kristiyanong kapistahan ngunit sa paglipas ng panahon ay halos nawala na ang Kristiyanong kahulugan.
“The tragedy is if it becomes completely de-Christianized, then it becomes almost impossible to re-Christianize it, you know? If it becomes totally… like Halloween, at this point, you can’t… How are you going to… Yeah, we lost it, and you can’t really get it back.” Dagdag pa ni Archbishop Brown.
Kaugnay nito, ipinaliwanag ni Archbishop Brown na ang Feast of the Exaltation of the Cross ay nag-uugnay sa ilang sinaunang tradisyon tungkol sa Banal na Krus, kabilang ang paghahanap nito ni Santa Helena at ang pagbabalik ng mga relic ng Krus sa Jerusalem noong ika-7 siglo.
Para sa Simbahan, ang pagpapanatili sa Kristiyanong ugat ng mga popular na debosyon ay mahalaga upang ang mga tradisyon ng pananampalataya ay patuloy na maging daan ng mga mananampalataya patungo kay Kristo.
