11,228 total reads
Inilunsad ng Diocese of Cubao ang “Simbakuran” upang tugunan ang lumalalang kahirapan at laganap na kahirapan.
Layon ng Simbakuran na pag-isahin ang mga simbahan at bakuran ng mga pamilyang Pilipino na magkaroon ng taniman ng gulay at prutas.
Inihayag ni running Priest Father Robert Reyes na malaking tulong sa kabuhayan ng mga mahihirap na pamilya ang urban farming.
Ayon kay Fr.Reyes, sa halip na bumili ng gulay sa palengke ay maaring anihin ito sa sariling bakuran at ibenta kapag sobra sa pangangailangan.
Itinuturo din sa mamamayan ang waste management at composting upang gawing pataba ang basura—isang hakbang na nagpapababa ng gastos sa produksyon at nagtataguyod ng sustainable na kabuhayan.
“Kung lahat ng parokya ay lalahok, matutupad ang aming motto: magtanim upang may makain, upang may kanin. Hindi lang ito simpleng pagtatanim, kundi isang konkretong paraan upang matugunan ang kagutuman sa komunidad. Sa pamamagitan ng urban farming, natututo ang mga tao na gamitin ang kanilang bakuran bilang pinagkukunan ng pagkain. Nabawasan na ang gastusin, nagkakaroon pa ng dagdag na ani na maaaring ibahagi o ibenta. Ito ay isang hakbang tungo sa mas matatag at self-sufficient na pamumuhay,” ayon sa panayam ng Radyo Veritas kay Father Reyes.
Iginiit ni Fr.Reyes na ang programa ay panlaban sa “ayuda mentality” na umaasa lamang sa tulong pinansiyal mula sa pamahalaan sa halip na magsariling sikap sa pagtatanim.
Nilinaw ng pari na isinusulong sa Simbakuran program ang prinsipyong “Magsaka!, di Ayuda!,”kung saan hinihikayat ang mga mamamayan na maging masinop at produktibo, gamit ang kahit maliit na espasyo tulad ng mga pader at bubong para sa vertical gardening.
“Ang aming panawagan ay magsaka, di ayuda. Hindi namin sinasabing mali ang ayuda, pero hindi ito dapat maging pangmatagalang sandalan ng mamamayan. Kahit sa siyudad, pwedeng magtanim gamit ang maliit na espasyo tulad ng pader at bubong. Sa ganitong paraan, natututo ang bawat pamilya na umasa sa sariling kakayahan at hindi lamang sa tulong ng gobyerno. Kapag pinagsama ang sipag, kaalaman, at pananampalataya, nagiging posible ang isang komunidad na may sapat na pagkain at hindi nagugutom,” bahagi pa ng panayam kay Fr.Reyes.
Ipinaliwanag ng Pari sa mamamayan na anumang ayudang matatanggap mula sa gobyerno ay maaring gamiting puhunan upang palawakin ang urban farming sa kanilang tahanan.
