1,014 total views
Binigyang-pugay ng Teacher’s Dignity Coalition (TDC) ang bawat guro sa paggunita ng World Teachers Day sa October 5.
Ayon kay Benjo Basas – Chairperson ng TDC, napakahalaga ang pagdiriwang at pagkilala sa mga guro sa gitna ng nararanasang COVID-19 pandemic.
“Marapat na ipagdiwang dahil itoy pagpapahalaga sa mga teacher natin, pagpapaalala sa madla, sa buong mundo na ang mga guro ay napakahalaga dahil humuhubog ng lipunan. Yung mga bata, tinuturuan na eventually sila rin yung henerasyon na magmamana ng ating society in the very near future,” pahayag ni Basas sa Radio Veritas.
Ipinaalala naman ng TDC na gamitin ang pagdiriwang sa World Teachers Day upang palakasin ang panawagan na matugunan ang mga suliranin sa sector ng edukasyon alinsunod sa batayan ng United Nations Educational, Scientific and Cultural Organization (UNESCO).
“Mas mainam sana na yung ating mga guro ay bigyan talaga ng sapat na pagkilala, ng maayos na pagtrato sa pamamagitan ng pag-provide doon sa aming pangangailangan especially in terms of mga socio-economic needs and status of our teachers,” ayon pa sa panayam kay Basas.
Unang kinilala at binigyan ng pagpupugay ng Catholic Educational Association of the Philippines ang mga guro sa paggunita simula pa noong September 5 ng World Teachers Month na magtatapos sa October 5 bilang paggunita sa World Teachers Day.
Ayon sa CEAP, sinabi ng Kaniyang Kabanalang Francisco na ang pagiging guro ay isang misyon na pinipili ng ilan upang ibahagi ang edukasyon sa nakararami.
