3,438 total views
Hinikayat ni Bontoc-Lagawe Bishop Valentin Dimoc ang pamahalaan na pagtuunan ang pagpapabuti sa mga irrigation canals bilang paghahanda sa epekto ng El Niño Phenomenon.
Ayon kay Bishop Dimoc, chairman ng Catholic Bishops’ Conference of the Philippines-Episcopal Commission on Indigenous Peoples, karamihan sa mga katutubong magsasaka ang nangangamba dahil maaapektuhan ng labis na tag-init ang kanilang mga taniman.
Dati nang nanawagan ang mga magsasaka sa National Irrigation Administration para tugunan ang pagkakaroon nang maayos na patubig sa mga sakahan.
Sinabi ni Bishop Dimoc na may ilang irrigation projects ang tinupad ng NIA ngunit karamihan naman sa mga ito ang hindi gumagana.
“Kung kulang ang tubig para sa mga farmers, tanungin ang NIA kung ano ginawa nila sa pangangailangan ng farmers na irrigation canals. May alam ako na irrigation canal projects na worth hundreds of millions pero hindi functional. Alam ‘yan ng Commission on Audit dahil nakipag-participate ako sa Participatory Auditing pero no one was held accountable.” pahayag ni Bishop Dimoc sa panayam ng Radio Veritas.
Binigyang-pansin din ng Obispo ang patuloy na pagpuputol ng mga puno sa kagubatan kaya’t nababawasan na rin ang antas ng tubig sa mga watershed.
Iginiit ni Bishop Dimoc na dapat bantayan ng Department of Environment and Natural Resources (DENR) ang mga ganitong uri ng gawain sapagkat higit pa itong makadaragdag sa lumalalang epekto ng climate change kapag tuluyang naubos ang kagubatan at mapagkukunan ng tubig.
“Legal and illegal logging for several decades ang nangyayari kaya madali na gawing kaingin ang forest kasi wala ng malalaking puno. I know of an area na hundreds of hectares na Mossy Forest or Cloud Forest (high elevation na more than 1,000 meters above sea level) pero na convert into vegetable gardens.” giit ni Bishop Dimoc.
Taong 2019 nang huling umiral ang El Niño sa bansa kung saan nag-iwan ito ng halos P8-bilyong halaga ng pinsala sa sektor ng agrikultura.
