282 total views
Makikibahagi pa rin sa Traslacion ng imahen ng poong Hesus Nazareno ang mga nasalanta ng bagyong Nina sa Bicol Region.
Ito ang tiniyak ni Rev. Fr. Renato Dela Rosa, Social Action Director ng Diocese of Virac kasabay ng patuloy na pagbangon ng kanilang mga mamamayan mula sa epekto ng kalamidad.
Ayon kay Fr. Dela Rosa, lalong tumatag ang pananampalataya ng mga bikolano at marami sa mga naninirahan sa Catanduanes ang deboto ng Hesus Nazareno.
Aminado ang pari na maraming luluwas ng Maynila mula sa kanilang lalawigan para makibahagi sa Traslacion 2017 sa ika-9 ng Enero habang ang ilan naman ay nagsasagawa na ng pagnonovena sa mga parokya.
“Opo marami pa din ang magpa-participate coming from our province. Ang debosyon nariyan pa din patuloy pa din. Ang kagandahan dito bawat parokya mayroon pa rin nanalangin at nagdadarasal.”pahayag ni Fr. Dela Rosa sa panayam ng Veritas 846.
Nanindigan din si Fr. Dela Rosa na ang kanilang ginagawa ngayong pagtulong sa mga naapektuhan ng kalamidad ay walang pinipiling relihiyon.
Aniya, kahit hindi mga katoliko ay kasama sa kanilang gagawing rehabilitation program basta’t ito ay nangangailangan at labis na naapektuhan ng bagyo.
“wala tayong pinipiling relihiyon, basta yun totally damaged at hindi maaring tirhan o partially damaged na bahagi lamang ng kanilang bahay ang nasira kasama pa rin sa on going assessment natin.” Giit ng Social Action Director ng Virac Catanduanes.
Sa tala ng Diocese of Virac, hindi bababa sa 4,500 kabahayan ang nasira ng bagyo sa kanilang nasasakupan.
Magugunitang una nang nagpahayag ang iba’t-ibang institusyon ng Simbahang katolika ng layunin na tumulong sa mga naapektuhan ng kalamidad kung saan ang Caritas Manila ay magpapadala ng P300 libong piso para sa rehabilitasyon ng mga nasirang kabahayan sa nasabing lalawigan.
