Nakipagtulungan ang Department of Labor and Employment (DOLE) sa Department of Social Welfare and Development (DSWD) upang ilunsad ang ‘Mahalin at Kalingain ating mga Bata’ o Makabata Hotline laban sa Child Labor.
Layunin ng inisyatibo na mahikayat ang mamamayan na makiisa sa mga inisyatibo na iwaksi ang anumang gawain ng child labor at child abuse.
Ayon kay Labor Secretary Bienvenido Laguesma, bahagi din ang bagong programa sa tuluyang pagwawaksi ng child labor sa Pilipinas.
“Kinikilala ko rin ang bukas-palad na pagsuporta ng mga miyembro at social partners natin mula sa National Council Against Child Labor (NCACL)… Salamat sa walang sawang pakikiisa at paniniwala sa labang ito.” ayon sa mensahe ni Laguesma na ipinadala sa Radio Veritas.
Inaasahan ng kagawaran sa paglulunsad ng Makabata Hotline na mapanagot ang mga mahuhuling nang-aabuso sa mga bata na dapat ay nasa mga paaralan.
Bahagi pa ng programa ang pagbibigay ng rehabilitation at livelihood assistance sa mga pamilya o mapapatunayang child laborers upang hindi na bumalik sa gawain.
Sa tulong ng Makabata hotline ay maaring ipagbigay alam sa mga kagawaran sa pamamagitan ng pagpapadala ng mensahe sa mga numero bilang 0-9-6-0-3-7-7-9-8-6-3 at 0-9-1-5-8-0-2-2-3-7-5 email address na [email protected] ang mga kaso o pagkakataon na makakasaksi ng pang-aabuso o child labor.
Unang nanindigan ng Catholic Bishops’ Conference of the Philippines laban sa anumang uri ng pang-aabuso sa kabataan at higit na sa gawain ng child labor.
Hinimok ni Balanga Bishop Rufino Sescon Jr. ang mga mananampalataya, lalo na ang mga kabataan, na unahin munang patatagin ang kanilang personal na ugnayan kay Hesukristo bago akayin ang iba sa pananampalataya.
Ito ang buod ng pagninilay ng obispo sa Misa ng ikatlo at huling araw ng 12th Philippine Conference on New Evangelization (PCNE XII) na may temang “Sangkay,” kung saan binigyang-diin niyang si Hesus ang tunay na kaibigan, pinakamahalagang kayamanan, at matibay na pundasyon ng buhay Kristiyano.
Ayon kay Bishop Sescon, ang tunay na pagkakaibigang Kristiyano ay hindi nananatili sa pansariling kapakanan kundi patuloy na lumalawak upang maihatid ang iba kay Kristo.
“”Lalo na sa ating mga kabataan, ang huling araw ng PCNE ay iniaalay para sa inyo. Nawa’y tunay ninyong matuklasan na ang pinakalaman ng inyong puso ay si Hesus—ang ating kaibigan at Tagapagligtas—sapagkat Siya ang pundasyon ng ating pananampalataya. Hangga’t hindi natin tunay na kinikilalang kaibigan si Hesus—isang kaibigang nagmamalasakit, nagmamahal, at nag-alay ng Kanyang buhay para sa atin—hindi ganap na lalago ang ating pananampalataya. At kapag lumalim ang ating pananampalataya, kusa natin itong maibabahagi sa iba upang mas marami pang maging kaibigan ni Hesus,” ayon sa panayam ng Radyo Veritas kay Bishop Sescon.
Gayunman, sinabi nitong hindi magiging ganap ang misyong ito kung hindi muna matatagpuan ng bawat isa si Kristo sa kanilang sariling puso, sapagkat ang pananampalataya ay higit pa sa kaalaman—ito ay isang buhay at personal na relasyon sa Panginoon.
Ipinaliwanag pa ng obispo na kapag kinilala ng tao si Hesus bilang tunay na kaibigan na nagmamahal at nag-alay ng Kanyang buhay para sa sangkatauhan, kusang lumalalim ang pananampalataya at naibabahagi ito sa iba.
Kaugnay nito, hinamon niya ang mga dumalo na tanungin ang kanilang sarili kung sino pa ang maaari nilang akayin kay Kristo at kung sino ang patuloy na naghahanap sa “nakatagong kayamanan” na si Hesus.
“”Nagsisimula ang pagkakaibigan sa pagkilala sa isang tao. Hindi naman tayo agad nagiging magkaibigan; kailangan muna nating makilala ang isa’t isa. Ganoon din kay Hesus. Kilalanin natin Siya hindi lamang sa Kanyang mga itinuro o sinabi, kundi maging sa Kanyang puso at kalooban. Iyan ang hamon sa bawat isa sa atin—ang patuloy na palalimin ang ating ugnayan sa Panginoon. Sapagkat ang pananampalataya ay hindi lamang tungkol sa kaalaman o mga aral; higit sa lahat, ito ay isang buhay na relasyon kay Hesus,” bhaagi pa ng panayam ng RAdyo Veritas kay Bishop Sescon.
Idinaos ang PCNE XII sa University of Santo Tomas, kung saan inilaan ang huling araw ng pagtitipon para sa mga kabataan bilang susunod na henerasyon ng mga misyonerong alagad ng Simbahan.
Layunin ng PCNE na higit pang isabuhay ang diwa ng bagong ebanghelisasyon sa pamamagitan ng paghubog ng mga Kristiyanong nakaugat sa tunay na pakikipagkaibigan kay Kristo at handang maging “sangkay” sa pag-akay ng iba tungo sa pananampalataya.
Ibinahagi ni Ms. Joy Cancio kung paano ang kanyang pagkalugmok dahil sa pagkakalulong sa pagsusugal, kabilang ang pagharap sa isang matinding personal na krisis, ang naging daan tungo sa pagbabalik-loob at mas malalim na pagkilala sa Diyos sa ikaapat na bahagi ng Heart-to-Heart Talk ni Cardinal Luis Antonio Tagle sa 12th Philippine Conference on New Evangelization (PCNE XII).
Ayon kay Cancio, na dating dancer, talent manager at producer, nakamit niya ang marami niyang pangarap sa buhay kabilang ang pagkakaroon ng matagumpay na karera, negosyo at mga ari-arian, ngunit dumating ang panahon na unti-unting nawala ang mga ito dahil sa kanyang pagkahumaling sa pagsusugal.
“I have everything. I have the name, I have the money, I have my house, I have cars, I have a good business, I have a show. Pero lahat ‘yon tinanggal niya kasi ayaw ko tumigil sa sugal,” ayon kay Cancio.
Ikinuwento ng dating showbiz personality na nagsimula lamang sa paglalaro ng slot machine ang kanyang bisyo hanggang sa humantong ito sa malaking pagkalugi at pagkakautang, dahilan upang harapin niya ang pinakamabigat na pagsubok sa kanyang buhay.
Sa tindi ng kanyang pagkalugmok, sinabi ni Cancio na dumating siya sa puntong nawalan siya ng pag-asa at tinangkang wakasan ang kanyang buhay.
Ngunit sa gitna ng takot at paghihirap, muling nanumbalik ang kanyang pananalig sa Diyos at humingi ng tawad, gabay at bagong direksiyon sa kanyang buhay.
“Sabi ko, Lord, forgive me for what I have done. This time, I will follow. I will listen. Just show me the right path,” pagbabahagi ni Cancio.
Ayon kay Cancio, ang karanasang iyon ang naging simula ng kanyang mas malalim na pagbabalik sa Diyos matapos niyang maranasan ang pagtanggap at pagmamahal ng mga taong tumulong sa kanya na muling bumangon.
Higit niyang naramdaman ang presensya ng Diyos at naunawaan na ang tunay na kayamanan ay hindi lamang nasusukat sa tagumpay kundi sa relasyon sa Panginoon at sa pamilya.
“Dati, lumalapit ako sa Panginoon kapag may hiling ako. Nakakalimutan ko magpasalamat. Pero ngayon, kung ako po ay nagsasayaw noon para kumita, ngayon nagsasayaw na ako para sa Panginoon,” pahayag niya.
Pinuri naman ni Cardinal Tagle ang katapatan ni Cancio sa pagbabahagi ng kanyang karanasan at binigyang-diin na sa kabila ng pagkakamali ng tao ay nananatiling kaibigan ang Diyos na handang tumanggap at magbigay ng bagong simula.
“Minsan, iiwanan ka ng ibang tao. Hanggang sa makita natin may isang kaibigan na magiging tapat at maaasahan na kayang tanggapin pati yung ating pagkakamali. Kaya tayong tanggapin ni Jesus, pero minsan tayo hindi natin kayang tanggapin ang sarili natin,” pahayag ni Cardinal Tagle.
Sa pagtatapos ng kanyang pagbabahagi, hinikayat ni Cancio ang mga kabataan na umiwas sa pagsusugal at palalimin ang pagkilala sa Salita ng Diyos bilang sandata laban sa tukso at mga pagsubok sa buhay.
“When I accept Jesus in my life, I should know the Word of God. ‘Yun po ‘yung panglaban ko para makatayo ako sa mga tukso,” dagdag ni Cancio.
Hindi lamang pagbibigay ng materyal na tulong kundi ang pagkilala sa mga dukha bilang tunay na kaibigan ang nagiging daan upang mabago ang buhay ng kapwa at mapalalim ang pananampalataya.
Ito ang ibinahagi ni Bro. Artemio “Jun” Manuben, OFS, kasapi ng Secular Franciscan Order at full-time catechist ng Catechetical Foundation of the Archdiocese of Manila (CFAM), sa ikatlong bahagi ng Heart-to-Heart Talk ni Cardinal Luis Antonio Tagle sa 12th Philippine Conference on New Evangelization (PCNE XII) na ginanap sa University of Santo Tomas Quadricentennial Pavilion.
Si Bro. Manuben ay kabilang sa Franciscan Catechists na nagsasagawa ng katesismo at paglilingkod sa mga maralitang komunidad, kabilang ang mga batang nangangailangan ng gabay at pag-aaruga sa mga lugar sa Maynila.
Ayon sa lay Franciscan, ang kanyang pagmamahal kay San Francisco de Asis ang nagtulak sa kanya upang higit na yakapin ang misyon ng paglilingkod sa mga mahihirap at mga nasa laylayan ng lipunan.
“Hindi ko na lang sila tinuring na mga pulubi. Parang tinuring ko na rin silang mga kaibigan,” pagbabahagi ni Bro. Manuben.
Ikinuwento ni Bro. Manuben na nagsimula ang kanyang mas malalim na pakikipag-ugnayan sa mga mahihirap nang makadaupang-palad niya ang isang pamilyang namumuhay sa Delpan, Sta. Ana na dumaranas ng matinding kahirapan at suliranin sa bisyo.
Sa halip na minsanang pagtulong, pinili niyang patuloy silang samahan hanggang sa magkaroon ang pamilya ng mas maayos na tirahan at pagkakataong makapagsimula muli.
“Ang tinuro nila sa akin, kung paano ko sila mahalin. Hindi lang mahalin, bigyan din sila ng pag-asa,” ani Bro. Manuben.
Ibinahagi rin ng lay Franciscan na unti-unting bumuti ang kalagayan ng pamilya matapos silang matulungan na magkaroon ng mas maayos na kapaligiran para sa kanilang pamumuhay, habang malaking bahagi naman ng kanyang kinikita bilang katekista ang inilaan niya sa kanilang pagkain, upa at iba pang pangangailangan.
“Halos 80 percent ng natatanggap kong sahod ang napupunta sa [pagtulong] sa mga mahihirap. Kaya sabi ko, ito pala ‘yung pagiging kaibigan—’yung pagbibigay ng pag-asa, pagbibigay ng pagmamahal sa kanila,” dagdag pa niya.
Binigyang-pugay naman ni Cardinal Tagle ang patotoo ni Bro. Manuben at sinabing ang pagbabago ng pagtingin sa mga dukha ay nagpapakita ng tunay na diwa ng pamumuhay ni San Francisco de Asis.
Ipinaliwanag ng kardinal na ang tunay na pakikipagkaibigan ay nagbubukas ng isang bagong pananaw sa pagbabahagi, kung saan ang pagbibigay ay hindi lamang nagmumula sa labis na mayroon ang isang tao, kundi sa pusong handang makibahagi sa buhay ng kapwa.
“Kapag kaibigan, pamilya, it’s not just the surplus that you give… Hindi ka nawawalan kasi pamilya ang pinagbigyan mo. It’s a different type of vision,” ayon kay Cardinal Tagle.
Sa pagtatapos ng talakayan, binigyang-diin ni Cardinal Tagle na ang ganitong uri ng pagkakaibigan ay may kakayahang baguhin hindi lamang ang buhay ng mga nasa laylayan kundi maging ang Simbahan at lipunan, sapagkat sa bawat taong tinatanggap bilang kaibigan ay higit na nahahayag ang presensya ni Kristo sa gitna ng sambayanan.
4,563 total views Mga Kapanalig, sa pagtatapos ng pagdinig ng impeachment court sa Article 4 na may kaugnayan sa pagbabanta umano ni Vice President Sara Duterte
124,094 total views “A Filipino culture ruined by politics, of indifference, ideology, self-interest”. Kapanalig, likas sa ating mga Pilipino ang kultura ng pakikipagkapwa o pakikitungo sa
152,386 total views Kapanalig, malimit nating naririnig ang katanungang, “NASAAN ANG SIMBAHAN”? Kapag may nangyaring trahedya., sakuna., man-made calamities., kawalan ng moral na pamumuno., WHERE IS
198,317 total views Mga Kapanalig, upgraded na daw ang Pilipinas! Ayon sa World Bank, ang Pilipinas ay isa nang upper-middle income country. Ibig sabihin, lumampas na
231,183 total views Mga Kapanalig, napanood ba ninyo ang dokumentaryo tungkol sa lupang ninuno o ancestral land ng mga katutubong Aeta na ginawang tambakan ng basura
394 total views Hinimok ni Balanga Bishop Rufino Sescon Jr. ang mga mananampalataya, lalo na ang mga kabataan, na unahin munang patatagin ang kanilang personal na
27,830 total views Binigyan-diin ng Prior Provincial ng Dominican Province of the Philippines Father Filemon Dela Cruz Jr., O.P – , ang ‘pag-ibig’ bilang pundasyon ng
9,213 total views Nanawagan ni San Fernando, La Union Bishop Daniel Presto ang mas malalim na pakikipagkaibigan kay Hesus bilang pundasyon ng sama-samang misyon ng Simbahan.
19,762 total views Pinatatag ng Australia at De La Salle University (DLSU) ang matagal nang ugnayan sa edukasyon, kalakalan, at pangrehiyong kooperasyon bilang bahagi ng pagsusulong
