26,818 total reads
Pinaalalahanan ni Apostolic Nuncio to the Philippines Archbishop Charles Brown ang mananampalataya na aktibong makibahagi sa misyon ng simbahan sa gitna ng patuloy na pag-usbong ng teknolohiya at mga hamon ng makabagong panahon.
Sa pagtatapos ng ika – 11 edisyon ng Philippine Conference on New Evangelization (PCNE XI) binigyang diin ng nuncio ang kahalagahan ng panalangin upang maisakatuparan ng bawat binyagan ang tawag ng paglilingkod bilang ‘pilgrims of hope, active sharers of faith, at joyful missionaries of love.
“At this moment of salvation history, in 2025, God is choosing you… You are chosen to do something beautiful for God,” bahagi ng pagninilay ni Archbishop Brown.
Iginiit ng opisyal ng Vatican ang kahalagahan ng panalangin bilang puso ng pagmimisyon kasabay ng paalalang unahin ang ugnayan sa Diyos sa gitna ng abala at ingay ng mundo.
“If we don’t pray, we don’t end up having much to give… The fruitfulness of our mission is rooted in our closeness to Jesus,” ani Archbishop Brown.
Tinuran ng arsobispo na makalipas ang mahigit isang dekada mula nang ilunsad ni noo’y Manila Archbishop Luis Antonio Cardinal Tagle ang PCNE noong 2013 ay nanatiling matibay ang pagtitipon taun-taon na pangunahing layuning isulong at paigtingin ang misyon ng ebanghelisasyon sa pamayanan.
Muling ginanap ang PCNE sa Pontifical and Royal University of Santo Tomas na dinaluhan ng 5, 000 mananampalataya mula sa iba’t ibang diyosesis sa bansa na binubuo ng mga pari, madre, relihiyoso, mga laykong lingkod partikular ang mga kabataan at katekista.
Katuwang ng nuncio sa closing mass si Manila Archbishop Jose Cardinal Advincula, Lucena Bishop Mel Rey Uy at San Fernando La Union Bishop Daniel Presto ang kasalukuyang chairperson ng CBCP Commission on Evangelization and Catechesis.
Samantala lubos naman ang pasasalamat ni Cardinal Advincula sa lahat ng mga nakiisa sa pagtitipon kung saan pinangunahan din nito ang pagtatalaga ng sarili at bansa sa Sacred Heart of Jesus habang inanunsyo ang susunod na edisyon ng PCNE o PCNE XII sa July 24 to 26, 2026.
