27,885 total reads
Ikinababahala sa Biñan City, Laguna ang banta ng pagkakasakit sa pamayanan bunsod ng patuloy na pagbaha dulot ng walang tigil na pag-uulan sanhi ng hanging Habagat na pinalakas ng magkakasunod na Bagyong Crising, Dante, at Emong.
Sa ulat ng San Pablo Diocesan Social Action Commission at ng residente ng Barangay Dela Paz, Biñan City na si Annalisa Onofre, umapaw na ang Biñan River at Laguna de Bay, dahilan upang lalo pang tumaas ang antas ng baha sa lugar.
Nangangamba ang mga residente dahil katulad nang naranasan sa mga nagdaang kalamidad, inaabot ng tatlong buwan o higit pa bago humupa ang baha, na nagdudulot ng pagtaas ng kaso ng dengue at iba pang karamdaman, lalo na sa mga bata.
“Wala pong tigil ang ulan kaya umapaw na naman [ang] ilog. Puno na rin ang [lawa] kaya salubungan na po ang tubig,” ayon kay Onofre.
Ilan sa mga opisyal ng Laguna ang nagmumungkahi ng dredging o paglilinis at paghuhukay sa Laguna de Bay upang mapalaki ang kapasidad na mag-imbak ng tubig at matugunan ang matinding pagbaha sa mga bayan at lungsod sa paligid ng lawa.
Nagpasa si Biñan City Representative Arman Dimaguila ng isang resolusyon sa Kongreso na nananawagan sa House Committee on Ecology na ipatawag ang Department of Public Works and Highways (DPWH), Laguna Lake Development Authority (LLDA), at iba pang kaukulang ahensya upang pag-aralan ang panukalang dredging.
Tinatayang aabot sa halos 11,500 pamilya sa Biñan City ang apektado ng malawakang pagbaha.
Samantala, nananawagan naman ang San Pablo DSAC ng panalangin at tulong para matugunan ang pangangailangan ng mga naapektuhan ng pagbaha.
