32,428 total reads
Nanawagan si San Carlos, Negros Occidental Bishop Gerardo Alminaza sa Simbahan sa Asya na agarang kumilos para sa kalikasan, bawiin ang puhunan mula sa mga mapaminsalang industriya, at pakinggan ang sigaw ng kalikasan at ng mga mahihirap.
Ipinahayag ni Bishop Alminaza ang panawagang ito sa ikalawang Laudato Si’ webinar ng Radio Veritas Asia noong July 31, 2025, na may temang “Celebrating 10 Years of Laudato Si’: The Ecological Response of the Asian Church.”
Layunin ng webinar na tipunin ang mga tinig mula sa iba’t ibang bansa sa Asya upang pagnilayan ang naging bunga ng ensiklikal ni Pope Francis para sa kalikasan at ang lumalalang banta ng krisis sa klima.
“Seven of the ten most climate-vulnerable countries are in Asia, including the Philippines, Myanmar, Bangladesh, Pakistan, and Thailand. Over 80% of disasters in Asia in the past two decades were climate-related. We are not just reading statistics. We are living them,” ayon kay Bishop Alminaza.
Binigyang-diin ng obispo na ayon sa Laudato Si’ at Laudate Deum ng yumaong Santo Papa, ang pangangalaga sa kalikasan ay dapat magsimula sa sarili, palawakin sa pamayanan at lipunan, at sabayan ng makabuluhang pagkilos ng Simbahan.
Ibinahagi rin ni Bishop Alminaza ang ilang makakalikasang proyekto sa Asya, kabilang ang mangrove reforestation sa Timor Leste, interfaith solar energy projects sa India, at climate resilience programs ng Simbahang Katolika sa Bangladesh.
Sa Pilipinas, binangiit ng obispo ang 10 Million Solar Rooftop Challenge, Bamboo Forest Project, at ang paggamit ng Laudato Si’ School Framework sa Catholic education.
“These efforts show that ecological conversion is not just a concept, it’s a movement taking root in our communities,” giit ng obispo.
Hinikayat din ni Bishop Alminaza ang pagbuo ng Laudato Si’ Synodal Platform for Asia upang pag-ugnayin ang mga paaralan, parokya, at diyosesis sa iisang misyon para sa kalikasan, kabilang dito ang pagbuhay sa karunungang pamana ng mga ninuno, pagtalikod sa pamumuhunan sa mapaminsalang proyekto, at pagtutol sa pag-unlad na banta sa mga pamayanan.
“Let us become seeds of hope in a planet crying out for healing,” saad ni Bishop Alminaza.
